知己難求！鄭秀文（Sammi）起碼搵到兩個好姐妹，一個係香港女富商、劉鑾雄老婆甘比，一個係凍齡女神鍾楚紅！
Sammi喺社交網貼三人舊合照，呢張相係佢哋嘅首張合照。Sammi認為人同人相處最重要唔複雜，真誠就可以長久，而呢張相，Sammi一直珍藏至今，仲大讚素顏紅姑好天然好靚，同甘比善解人意：「Mi覺得能夠講真話嘅朋友（友誼）非常重要，這些年來的相處，跟這二人都能夠分享內心說話和夢想，有話直說，唔使轉彎抹角。紅姑是非常有藝術品味和藝術知識嘅人，個性瀟洒獨立兼且有很好嘅生命價值觀，（我同佢時時撞衫，因為我哋鍾意嘅嘢好似）Kim的個性則善解人意兼且貼地氣。」
甘比同Sammi、紅姑點解會相熟呢？一來因為甘比前係記者，同唔少名人都係好朋友；至於紅姑，因為大劉同林建岳好friend，當年岳少嘅女朋友係Monica，而Monica同紅姑好熟，就係咁，紅姑都對甘比好好。有次紅姑知道甘比想買花，就陪甘比去花墟揀花，有時又帶甘比去買衫俾意見。
而Sammi就係喺朋友介紹下識咗甘比，兩個好投契。前年Sammi開紅館騷一票難求，但就特登留咗幾場飛送畀甘比，仲要係VIP靚位㖭。除咗紅姑，甘比同徐濠縈都好好朋友，阿徐不時帶囡囡康堤到甘比家作客，佢哋仲相約過一齊去旅行0架。
唔知係咪雨天關係，今日Sammi比較感性，除咗紀念同甘比、紅姑嘅友情之外，Sammi仲貼咗同愛貓mike mike合照，自封「貓奴」留言：「還有幾天，貓咪mike mike就是九歲了。好感激生命中有佢，記得我初初自己一個人搬出去住嘅時間，有些時候回到家裏只我一人會覺寂寞，但自從mike mike進入我生命，色彩也就更豐富了。我同mike mike一樣，個性充滿瑕疵，不過我們哋就臭味相投，彼此接納。佢有時會『蝦』我，不過，貓奴被『蝦』，甘心樂意，為奴為婢，變相的溺愛。呵呵！貓奴，你們會懂的。」
 |  2011年鄭秀文世界巡迴演唱會澳門站，甘比都有去。 （網上圖片） |  去年9月，紅姑與甘比響應號召，接受Ice-cream Challenge。（網上圖片） |
 Sammi說：「這些年來的相處，跟這二人都能夠分享內心說話和夢想，有話直說，唔使轉彎抹角。」（ig圖片) |  Sammi近日似乎愛上貼舊圖，連舊片也不錯過。（ig圖片) |  貓奴心聲。每個貓奴與主子都有動人故事。 （ig圖片) |
