拍拖有咩好做？行街睇戲食飯唱K登山呢啲，相信有好多人做喇，有冇啲咩活動係再有益啲、再有意義啲嘅呢？或者捐血係一個好選擇。


日前啱啱度過37歲生日嘅袁偉豪（新聞連結：https://bit.ly/2IhvSz3），生日過咗，劇又播完，應該有少少空閒時間嘅，今日佢就喺自己個Instagram度貼相，透露自己去咗捐血，佢仲簡單留言話：「捐血助人，是必須的」，見佢攞咗一大塊「給血聯盟」嘅宣傳紙板，又喺IG限時動態中，透露自己捐咗450毫升血，又問「大家去嗎？」，咁落力幫手宣傳，就知佢真係好有心。


睇相嘅網民，唔止見到佢騷壯臂，仲有人留言讚袁偉豪，話佢：「講到做到，前幾日live先話要做多啲善事，今日就去捐血了，俾個like你。」


而袁偉豪嘅善行，又何止一個like？因為今日捐血嘅唔止係佢，仲有佢女友張寶兒。


張寶兒今日亦喺IG貼相，記低去咗捐血，佢留言話：「照顧好自己的身體，還有一個好處」，雖然張寶兒冇同男友合照，但隱約見到相角有另一人嘅頭髮，不過好事梗係唔怕被人知，稍後喺香港紅十字會輸血服務中心嘅facebook度，見到佢哋張合照，袁偉豪同張寶兒仲拎住自己包血嚟影相留念，可見兩個都係有心人。


據香港紅十字會輸血服務中心網頁提到，每人所捐贈嘅一包全血，可救治3個或以上病人，所以捐血救人，真係有賴大家嘅無私貢獻。




袁偉豪喺IG貼捐血相，獲網民讚賞。（袁偉豪Instagram圖片）佢仲問大家要唔要加入捐血者行列（袁偉豪Instagram圖片）張寶兒都有去捐血（張寶兒Instagram圖片）