馬浚偉今日喺演藝學院出席「第10屆香港小劇場奬」，負責頒發「最佳女主角」奬項，問佢要唔要負責評分？馬仔話：「冇呀，我未夠資格，我仲係學習當中。」
對於下月底嘅舞台劇《偶然・徐志摩》，馬仔表示胡定欣過兩日返港，繼續排練，佢話：「定欣有part 2分10秒嘅水袖舞表演，一個人獨腳戲，好難，雖然佢有中國舞底子，但同水袖舞係兩回事，不過有舞蹈底子會好啲，我相信佢會好enjoy，信心一定有，但都會有壓力。」點解折磨定欣？馬仔笑指：「唔係折磨，除咗劇集上，佢好想喺舞台上搵到另一面嘅自己，如果我能夠令佢喺舞台上，被人睇到另一個層次，我會好有成功感。」由於佢同定欣曾合作劇集《宮心計2深宮計》，所以已有一定嘅默契，就連監製梅小青都讚佢哋嘅纏綿戲同談情戲都拍得好好，所以希望藉呢部舞台劇延續嗰份激情。
講到兩個契妹鍾嘉欣同陳法拉，馬仔表示早前曾經食飯聚，佢話：「嘉欣喺Ig話自己食雪糕，我即刻留言叫佢『唔准食』，不過佢冇覆我，唔知係咪block咗我呢，之後食飯有傾合作，不過等1年先，同埋佢要盡快決定繼唔繼續生，因為生過好容易再懷孕；至於法拉喺美國讀完書，有個大型舞台劇搵佢，但佢話要考慮，我叫佢唔收錢都做啦，更何況係有錢收，而且仲要同好top嘅演員合作。」
 攝影：陳俊強 |  馬仔今日出席「第10屆香港小劇場奬」，負責頒發「最佳女主角」奬項。 |  |
