今日喺鯉魚門公園及渡假村出席新片開鏡嘅張智霖（Chilam），透露演警察，仲劇透埋戲中嘅未婚妻胡杏兒被炸死，所以佢要keep住精神唔正常嘅狀態。


怕唔情緒方面抽離唔到？佢話：「都驚，要好小心處理，係技術嘅一部份，做演員都係玩自己嘅一個行業，又喜又悲，情緒大上大落，有時都唔知情緒收埋喺身體入面邊個部份。做運動係好啲，所以同個仔玩滑板、滑水，噚日撐咗一日獨木舟。」


由於Chilam電影一部接一部，所以就算獲紅館批出檔期，佢都要無奈擱置：「拍電影要花好多心思同時間，我本來攞到紅館嘅年尾檔期，已經到手，但係真係要開演唱會，我0依家就要籌備、宣傳各樣嘢，如果我o依家走唔開，我唔想到時迫自己去做，因為我好想好認真去做好演唱會，每一次都係難能可貴，每次都當最後一次去做，所以每次都想做得好好，或者明年、後年啦！」


Chilam又笑指跟鎮宇閒聊，最鍾意傾車、錶，佢話：「我平時會上網bid，我就介紹咗畀鎮宇，都貴㗎！雖然未知價錢幾多錢，總之係保值。」


至於同片嘅周秀娜喺戲中飾演鑑證科嘅高級督察，角色較cool，但有個怪癖，鍾意儲屍體相，又鍾意工作，四年都唔放假，不過娜姐笑言喺現實生活中，冇可能四年唔放假：「要放下假，唔可以淨係得個做字，要調節下自己，心理要平衡下。」提到佢同ChiLam較多對手戲，有冇感情戲？娜姐話：「係鍾意、欣賞，佢對於我哋嚟講，係一個神話嘅人，所以有理冇理，我同導演講呢個鏡頭係咪應該有Chilam喺隔籬呀！」



（攝影：陳俊強）Chilam（左）今日同古仔及鎮宇（右）今日一齊出席新片開鏡。
Chilam話要keep住精神唔正常嘅狀態，擔心抽離唔到。娜姐話Chilam係一個神話級嘅人胡杏兒（左）