現年48歲的唐文龍，入行22年走過不少低谷，足迹踏遍中港台的他，早前憑電視劇《溏心風暴3》一嘗爆紅滋味。日前唐文龍接受本報專訪，他感慨謂：「唔敢講話吐氣揚眉，但呢三、四個月嘅訪問，真係多過我呢一生喺娛樂圈做嘅訪問，斷斷續續連埋電話、電台，五、六十個都唔止。我唔想假裝謙卑，我反而想講，我哋做演員，今日唔知聽日乜嘢事，聽日唔知後日咩事，今日嚟講有人在乎，我好高興，只能享受今日嘅在乎，用呢種力量去面對明天。」
唐文龍自言並非出生富裕家庭，雖然小學舉家移民美國，但家庭環境並不理想：「有段時間媽咪剪supermarket嘅coupon，有乜減價就食乜，細個有埋怨，唔明白點解又係食嗰啲，o依家大個懂事，就知生活唔容易。」
曾經在台灣出過唱片的唐文龍坦言：「當年唔理家人反對做歌手，但搵朝唔得晚，去台灣要兼職幫人畫時裝計設圖，五百、三百一張咁幫啲廠家畫。」之後他回流返港，99年加入無綫，但並未脫貧，住過劏房，也趁樓市低買了樓。他笑笑口說：「都有穩定收入嘅，只係非常唔理想，開頭大約搵五位數一半（即5,000元)，但唔好講得過份淒涼，因為大把人都冇。之後有段時間雙生雙旦，三生三旦，收入好啲，只係最尾兩年，自己擺位冇想像中咁，就硬着頭皮出去闖。」
唐文龍曾在內地打滾11年，問他是否覺得內地錢較容易賺？他即苦笑謂：「大家有錯覺，好似去到內地有金執，冇呢回事，佢哋環境大一千倍，但同樣競爭都大我哋一百倍。」他又說：「除咗顧住大陸生活費，香港層樓仲要供，試過九月個冇錢供樓，要問屋企人借錢。」
藝人心理素質好重要，唐文龍自爆亦有脆弱時，幾次想過放棄：「做呢行就係一個賭注，行內叫擺自己上枱。始終覺得轉行好困難，半紅不黑，老闆係咪會請你？早轉行嘅人真係好勇敢，走唔到嘅就一定要帶錢入行，冇錢都要盡量儲，要慳，唔好諗住當前風光可以咁落去。」
唐文龍指自己的堅毅性格，是由小時候開始培育，因為小時候是「奀仔」，在外國讀書經常被「蝦」，所以每日放學就去操場練體能，11、12歲就打破學校拉單槓紀錄。如今唐文龍是公認「肌男」，一邊做訪問也一邊教大家做體能運動，他說：「運動係最平嘅消費項目，有段時間冇乜嘢做，冇工開都唔可以令自己意志消沉，做運動係最平。」問他是否跟教練狂操？他卻說做gym時望其他人，偷師學回來的：「因為要錢（搵教練），唔好話人貴，係物有所值，但我負擔唔起。當然現在上網就有好多，但以前年代就要咁偷師囉。」
