庾澄慶今日出席威士忌酒展活動，問到佢有冇試過飲醉酒，佢自爆有次喺「歌神」張學友慶功宴上，佢哋飲得太high，醉後被「撿屍」，一覺醒來先驚覺自己同學友瞓咗喺同一張床，庾澄慶笑言：「我看著他醒來，含情脈脈看著他，他沒有看我。」
當時歌壇分成「香港幫」及「台灣幫」，所以年輕氣盛嘅學友同庾澄慶先會不時鬥酒量，庾澄慶回想：「醒來只想說，怎麼會這樣。」
拼酒量，媒體笑問當時佢哋有冇着衫，哈林再諗一諗，之後噴笑講：「咦！我忘記了！有穿有穿啦，你想想看，一定是有人把我們扶上床，會有人扶我們上床後把衣服脫掉？沒穿也要幫我們穿吧！」哈林仲幽默咁話幸好當時唔流行影裸照放上網，即令全場大笑。
庾澄慶年輕時成日飲到斷片，佢以「不勝枚舉」嚟形容，以前喺學校返返昨屋企時有啲「茫」，仲被爸媽問：「你是去上學，怎麼像酒鬼一樣。」但現時年紀大會有身體狀況，所以慢慢知道飲酒傷身體，影響工作，心態成熟咗，唔需要同人哋鬥酒量，知道健康嘅重要，不過庾澄慶覺得自己酒量算唔錯：「沒到千杯不醉，千杯就會吐了，有些人直接乾杯、還喝純的，根本喪失品酒的意義，現在一杯慢慢喝，是很快樂的。」
庾澄慶同張學友老友鬼鬼，廿幾年交情，一向有講唔完嘅話題，據知張學友曾翻唱庾澄慶首《讓我一次愛個夠》而結緣，之後二人結為好友，經常喺演唱會上互相站台，而學友每次去台灣，庾澄慶都會盡地主之誼，曾被傳聞二人係一對，認真搞笑。
