70歲殿堂級歌手林子祥（Lam）越老越有型，日前佢撇甩老婆葉蒨文（沙麗），單拖到銅鑼灣行平民傢俬店，被讀者馮先生透過「爆相爆片」分享，原來私底下阿Lam係住家男人，一條麻甩佬買家品。
馮先生接受《蘋果》電話訪問表示：「嗰日朝早10點幾，喺銅鑼灣見到佢一個人落咗IKEA，中途見佢揀吓枱揀吓凳，再行落去撳下床、撳下枕頭，行咗20幾分鐘，最後買咗兩個膠盤，離開時搭的士走。」
可能時間尚早關係，店裏面都唔算太多顧客，從讀者提供「爆相爆片」所見，一身黑色型格look嘅阿Lam，好悠閒咁睇傢私，馮先生話：「佢皮膚曬到好黑，喺後面睇白頭髮又多咗，但個樣就keep得幾好，身型又夠高。」問到阿Lam表現係咪nice？馮先生表示：「我都行得幾近影，但佢同我冇乜眼神接觸，我以前都鍾意聽佢啲歌㗎，不過唔係fans心態，所以冇搵佢合照囉。」
阿Lam同第二任老婆沙麗結婚22年，雖然曾傳婚姻亮紅燈，但事實上兩人恩愛如昔，前年阿Lam喺紅館開騷，沙麗做嘉賓大爆老公秘聞：「我夜晚返到屋企就會見到佢喺度用針線縫衫，我好似嫁咗畀個識唱歌嘅裁縫。」而阿Lam同前妻吳正元就生咗一子一女，兒子林德信繼承衣鉢入行，細女林德怡都做咗媽咪，榮升外公嘅阿Lam對孫女十分疼愛。
 |  70歲殿堂歌手林子祥（Lam）越老越有型。（讀者提供圖片） |  |
