鄭中基、顏卓靈主演、新晉導演馮志強執導嘅電影《大樂師．為愛配樂》早前上映。可能宣傳時啲人以為係音樂劇，所以搞到好多觀眾都唔係好有意欲入場，搞到第一個星期嘅票房唔係咁好，所以好快就畀戲院商cut剩得每日一場。其實套戲借一單綁架案，賣溫情同愛情，又不失搞笑，係好多人杯茶。
上星期喺一班演員同導演努力謝票之下，場數同票房都有起色，加上口碑同埋劉德華都開口力撐，所以今個星期戲院商繼續支持。噚日同馮志強合作過《每當變幻時》嘅影后楊千嬅，都衝出嚟支持，佢睇完之後喺Instagram分享話「身邊不斷有朋友推薦這部電影，決定親自感受一下，結果是感動、浪漫、大愛。」就連鄭秀文都受到感召，係佢嘅facebook開心share，話好想睇套戲，相信佢好快會坐言起行，想見下Sammi嘅fans，不妨到戲院買飛入場，或者佢就坐係你隔離。
