吳岱融憑「鷲哥」一角人氣急急升，但戲好嘅背後，佢歌喉都好唔錯，話晒都唱過歌、出過碟，舊年仲錄咗首《回去愛你十億秒》送畀太太鍾淑慧（新聞連結：http://bit.ly/2FLdrRw
）。
相隔廿幾年，吳岱融再以歌手身份復出，灌錄一首有關兄弟情嘅國語歌《我的朋友不簡單》，仲搵嚟好兄弟歐陽震華（Bobby）、陶大宇、張兆輝、郭政鴻、廖駿雄（即《天師執位》個大粒癦）同鬼塚今日一齊喺太子錄音。
吳岱融透露呢首歌有份填詞，7月左右喺網上推出，佢仲表示好多謝呢班一齊共過患難嘅兄弟幫手，廖俊雄笑住話：「第二時扶靈都係呢幾個。」張兆輝指錄呢首歌嘅時候，好多回憶湧現。
見鬼塚手上拎住杯酒，佢哋笑指係開聲茶。過往都有唱過劇集主題曲嘅Bobby，笑謂今次好認真去唱，又指監製好鍾意佢把低音聲；至於新秀出身嘅郭政鴻，笑言雖然現時習武，但骨子裏係一個歌手。廖俊雄話：「佢叫我唱歌，嚇到我幾晚瞓唔着，歌詞都背咗10幾日。」
陶大宇則大讚吳岱融太太鍾淑慧功不可沒，除咗聯絡佢哋，仲負責將歌詞交畀佢哋，吳岱融話：「當時我都係諗住試吓，尤其係大家嘅檔期，我太太call佢哋，佢哋一小時內回覆OK，真心話，我係有淚光。」Bobby即刻笑住話：「其實個個都冇乜嘢做，根本日日都得。」
 （攝影：沈健程） |  吳岱融錄新歌，搵咗班兄弟嚟幫手，廖駿雄（右二）亦來支持。 |  佢哋笑言將來扶靈名單都係呢幾個人 |
 Bobby話其實大家都冇嘢做，所以好得閒嚟幫手。 |
