2歲嘅音樂人陳奐仁，日前喺fb貼咗條做gym玩戰繩嘅短片，結果一晚間喺網上瘋狂洗版，個個都留言話呢個肥仔嘅轉變，真係為唔少人帶嚟希望！噚日Hanjin同教練Lawrence喺鰂魚涌接受訪問，Hanjin話：「其實今次嘅動力都因為Lawrence，佢所有嘢都好似同我好夾，好啱我嘅心水，好踏實好健康好自然，我到o依家都冇戒過口、節過食，有時仲俾佢話我食得唔夠！」
坊間有唔少人覺得除咗要狂操之外，連食都要有節制，Hanjin即場叫教練解釋：「其實如果train得勁，之後休息乜都唔做，會令身體循環更加之慢，所以要做番啲輕鬆嘅運動，令新陳代謝會更加好啲！」因為呢個原因，Hanjin話如果喺香港嘅話，基本上去足健身房6日，假如出埠做嘢，Lawrence會寫低要做啲乜嘢，飲食方面，Lawrence話基本上可以食正常嘢嘢，唔需要特別戒口，好似做完運動，啲肌肉都需要吸收番啲能量。
Hanjin喺舊年8月開始做運動到o依家，由82kg減到70kg，Lawrence話Hanjin係一個好好嘅Trainning buddy，仲令到佢多咗原動力，Hanjin亦都話：「佢發明咗一啲動作俾我去做，雖然有啲動作未必係100分，但係呢啲動作可以俾我啲肌肉去成長，我自己都係慢慢進步。」佢哋仲即場教三大簡單嘅動作：「做掌上壓、引體上升同深蹲，大約做15分鐘，盡能力做就得，不過做之前記得要拉筋。」
