巫啟賢曾經為幾個大陸歌唱比賽節目做評審，寸過胡杏兒「talking不是singing」，又話認唔到蒙面李克勤嘅歌聲，被喻為巫老師嘅佢彈得人多，嚟緊24號喺澳門舉行《愛的太傻2018亞洲巡迴演唱會》，展示自己嘅實力，好自豪咁話：「之前已經演出咗五個地方，狀態一直保持得好唔錯，所以澳門嘅朋友有福喇！」


巫老師話今次開騷目的，除咗畀觀眾來個浪漫集體回憶，女兒歡歡都會上台父女合唱：「相信我嘅歌陪唔少歌迷走過人生某一段路，除咗回憶之外，我嘅演唱會仲有對下一代嘅盼望，所以叫歡歡上台合唱。」至於太太會唔會上台？巫老師表示：「太太好守本分，會喺台下同我鼓掌，佢唔會上台，唱歌都係交畀我啦。」




巫啟賢一家四口。大女歡歡將與老竇同台演出。