歌手林奕匡（Phil）同前無綫主持老婆李靄璣（Rikko）噚晚喺W酒店補擺喜酒，好多藝人都去飲贈興，其中Super Girls成員Aka着白色lace裙到賀，企喺新郎同新娘中間合照，但係就被網友留言狂插：「着白裙去人地婚禮真係好無禮貌」、「搶人地新娘子鏡，仲要企係人地中間，仲要着白色！好唔識Do!!..」KOL King Jer 都喺社交網開PO問各路網民Aka係咪真係犯咗婚禮禁忌。
事後Aka喺ig轉貼 King Jer帖文，留言道歉：「對不起，真的不知道參加婚宴穿白色會令人有所誤會，已致電Rikko說不好意思，幸好對方也沒在意，亦叫我不用放上心，但作為公眾人物，下次到別人婚禮，會再多留意衣著。」
Aka接受《蘋果》電話訪問解釋：「我覺得好抱歉，因為阿Phil同Rikko都係我好好嘅朋友，所以我今次去婚宴，好想着得端莊啲、靚啲，因為好想尊重佢哋，同佢哋好好慶祝一下，我純粹只係諗揀條靚裙，冇諗過禮節細節問題，所以我覺得好唔好意思，今次我係好大意同疏忽，都有即刻同Rikko講唔好意思同對唔住，佢好好，佢話：『傻妹，傻啦！』佢係完全唔care，大家開心就得，以後我會多啲留意。」
身為主人家嘅林奕匡亦喺電話表示，完全冇怪過Aka：「呢件事幾搞笑，因為我同Rikko一直都唔覺得有問題，亦都冇在意過，忙忙吓見到Aka send message畀Rikko不停道歉，o依家先睇番，係噃，佢都着咗白色，好多人留言『點解會着白色唔尊重』、『呢啲係常識嚟』，但我哋真係冇介意過，亦都冇諗過呢個係問題。」
林奕匡話最在乎Aka嚟到飲：「因為知道佢嗰日要做嘢，特登抽身過嚟扮到靚一靚，好開心佢同我哋一齊慶祝，唔覺得係有乜問題，反而見到佢咁自責，咁多人留言批評佢，我戥佢慘慘豬，希望佢冇為呢件事太過唔開心，我哋根本冇介意過，你知啦，我哋仲要係鬼仔鬼妹，都唔諗呢啲嘢嘅。」
 |  歌手林奕匡（Phil）同前無綫主持老婆李靄璣（Rikko）噚晚喺W酒店補擺喜酒。（資料圖片） |  Aka着白色裙企喺新郎同新娘中間合照，被網友留言狂插。（IG圖片） |
 事後Aka喺ig留言道歉。（IG圖片） |  Aka接受《蘋果》電話訪問解釋：「好想着得端莊啲、靚啲，因為好想尊重佢哋。」（資料圖片） |
