「荷蘭叻」陳百祥早年考到練馬師牌照，喺澳門做過練馬師，現時做馬主，養咗團體馬「太陽旺旺」交俾練馬師何良主理，不過荷蘭叻不時都同隻馬用心交流，近日陳百祥同老友譚詠麟(阿倫)去歐遊，阿倫有將啲selfie相放上微博，同行仲有幾個友人。
今日有網民問阿倫點解喺相中唔見陳百祥，阿倫搞笑指：「其實亞叻是有要務在身，你們想知道嗎？」等網民回覆後，阿倫喺微博貼出兩張阿叻嘅相，寫道：「亞叻的要務是和明晚出賽的馬兒……訓話。」原來佢同愛駒玩視像通話。
有網民就問陳百祥，「佢係唔係會講『馬馬你要叻叻豬啊、你唔乖到時爸爸返嚟打你手手』」、「叻哥真係忙不停手，度假應該同秀姑Happy吓先啱」，另有網民問譚詠麟任務係唔係偷拍。陳百祥早前講過目前最重要係活得開心，閒時踢波同練馬，生活安穩，間唔中先客串拍劇。
