薛家燕今日喺觀塘拍攝成人奶粉廣告，家燕話：「o依家年紀大，而且周圍都人口老化，好需要有啲產品為自己身體保健，我哋呢啲年紀最緊要係骨骼同心臟，所以呢啲產品都幫到我哋手。」講到保養心得，家燕姐話：「心境要保持開心，間唔中做吓運動，跳Hip Hop就唔得㗎喇，好似我咁跳吓十字步都幫到手。」
講到囝囝石耀庭嘅婚禮，家燕姐話已經籌備中，但因賓客眾多所以酒席要分兩日進行，佢話：「請吓請吓就發現自己請咗好多朋友，個個都話會嚟，後來囝囝先同我講媽咪今次係我嘅婚禮呀，我啲朋友都未請，我先醒起所以o依家就決定分兩日擺。」
家燕姐透露到時有好多朋友出席，包括七公主咁多位成員，佢話：「我哋20年先聚一次，啱啱先聚完上次仲講緊幾時再聚，佢哋就話等家燕做奶奶嗰日啦。」做完奶奶會唔會考慮吓自己幾時有第二春？家燕姐笑言：「呢啲嘢要考慮清楚先啦。」
