楊思琦係出名嘅慳妹，慳慳埋埋，有傳聞話佢買咗5層樓......係咪真？！思琦梗係唔會話俾大家知啦！不過，思琦確實係一個好念舊嘅人，未選港姐前，細細個就住喺大坑西新邨。2001年，思琦當選香港小姐冠軍，即被冠以「屋邨港姐」之名，但佢一啲都唔介意，因為呢個係佢成長嘅地方。


思琦話﹕「我由細到大都住喺大坑西，直至選完港姐後先搬走。依家每逢過年都會帶埋囡囡(楊卓穎)返嚟探親，但呢區都開始老化，好多年輕一輩都搬走咗。」思琦話以前屋村嘅設計夠闊落，同新樓冇得比，佢話﹕「依家啲樓好密集，但以前屋村嘅走廊多好長，隔籬鄰舍都會打開門，只關鐵閘，所以夏天唔使開冷氣都好通風。」


思琦話舊區嘅人街坊仲好守望相助，連保安員都好似當自己屋企咁，會喺屋邨種吓花草綠化環境。思琦記得小時候有好多幾層樓咁高嘅大樹，佢話﹕「以前有好多高樹，細個會好驚行去大樹附近，因為有好多老鼠，真係成千上萬呀！所以好多樹都通咗窿，搞到打風時冧咗，好傷心呀，因為啲大樹係陪住我哋成長。」


外表詩詩文文嘅思琦，原來小時候都好百厭，經常同哥哥一齊落公園玩，見到小斜坡，思琦兩、三步就跑咗上去，身手非常敏捷。佢笑笑口話﹕「依家年長咗喇，好彩仲跑到！」除咗鞦韆、滑梯、高低杆，思琦仲鍾意玩滑板，佢話﹕「呢度仲有個大公園，我最鍾意中秋節，可以賞月、點蠟燭，仲有玩火，哈哈，現在梗係唔可以啦，呢度實在有太多回憶喇。寶寶(囡囡)似我都係勇字行先，玩滑梯都好似跳水咁，頭向下，睇住佢玩就會安全啲。」


玩完，當然仲要食好西啦！思琦就推介一間與大坑西新邨相隔一條馬路，有47年歷史嘅車仔麵檔，佢話以前放學後就會約埋一班同學仔去食。麵檔老闆一見思琦就認得，話﹕「你由Form 1就已經嚟食。」老闆仲讚思琦妹十年(應該係接近30年)如一日，話﹕「你着番學生裝都仲可以呀！」


之後思琦仲返咗母校瑪利諾神父教會學校，見番以前嘅同學仔，佢話﹕「嗰位同學仔已經做咗呢間學校老師喇。」昔「屋邨港姐」變5層樓小富婆 楊思琦重遊大坑西日校外仲有一個雪糕伯伯，令思琦勾起好多回憶﹕「以前伯伯有賣凍嘅菠蘿，好好味，但伯伯離世後，佢嘅屋企人就送咗雪糕車俾學校紀念喇！」



(攝影﹕陳俊強、Teddy)思琦重遊大坑西新邨，咁長嘅屋邨走廊，現在好少見。保安員會喺屋邨內種小植物，綠化環境。
思琦身手仍然好敏捷，三步就跑咗上小斜坡。現在屋邨人口開始老化，思琦都係過年過節先返去探親友。以前中秋節，思琦最喜歡喺背後嘅亭園玩。
呢檔車仔麵有47年歷史，老闆讚思琦妹個樣冇乜點變。思琦仲返咗母校一遊，見面以前同學，現在變咗老師。
仲有以前喺校外擺檔嘅雪糕伯伯，都好令人懷念。