羅仲謙帶埋老婆楊怡噚日喺圓方戲院包場，帶埋屋企人同埋Fans一齊睇佢有份主演嘅《西遊記女兒國》。
謙仔話自己好少同Fans聚會，難得撞正情人節，所以特別包場一齊慶祝佢參與呢個大製作，一年一度嘅情人節，有冇去慶祝先？楊怡話：「我哋好Casual，從來都冇話大時大節會慶祝，不過今日咁啱啫，以前睇戲好怕被人影到，所以都好耐冇睇戲，o依家可以光明正大成班人一齊睇，好值得回味。」咁有冇準備情人節禮物先？楊怡笑言：「Casual到乜都冇啊。」謙仔係隔籬話：「你扮有得唔得啊，都未入場，入場咪知囉。」
噚日《西遊記女兒國》喺大陸上映咗一個鐘就已經大收成億票房（新聞連結：http://bit.ly/2CjXrju
），咁好成績導演有冇咩表示先？謙仔話：「呢個應該問老闆啦，有咁好成績老闆好開心。」佢仲叫大家如果睇完套戲唔好咁快走住，因為片尾彩蛋佢終於都唔係藍色。
今年嘅賀歲片都可以算得上陣容鼎盛，除咗《西遊記女兒國》之外，仲有黃子華嘅《棟篤特工》、梁朝偉嘅《捉妖記2》、劉嘉玲任達華嘅《我的情敵女婿》等，謙仔話：「百花齊放都好吖，對香港電影圈有好處，睇完我哋呢套咪再睇其他囉。」
謙仔喺戲中日日都要用五個鐘進行特技化妝，咁辛苦，老婆楊怡有冇煲啲湯水慰勞下老公先？楊怡話：「冇啦，都知佢辛苦，我都有去探班，但係佢個妝基本上係食唔到嘢，唯有精神上多啲支持，講多啲鼓勵說話。」謙仔話做埋今晚就收爐，如果成績好的話可能過完年會上大陸謝票，楊怡就話會陪老公好好休息下，準備為明年衝刺，順便都為「造人」衝刺下？楊怡笑言：「同步進行啦，我哋冇乜壓力，如果有好消息會同大家講嘅。」
 羅仲謙帶埋老婆楊怡包場睇《西遊記女兒國》 |  謙仔話自己好少同Fans聚會，難得撞正情人節，所以特別包場一齊慶祝佢參與呢個大製作。 |  問到情人節節目，楊怡話不嬲都好Casual，從來都冇話大時大節會慶祝。 |
 謙仔對今年賀歲片百花齊放，覺得對香港電影圈有好處。 |  楊怡話會陪老公好好休息下，準備為明年衝刺，順便都為「造人」衝刺。 |
