香港電視（1137）主席王維基總以挑戰者姿態出現。由城市電訊引入回撥長途電話、香港寬頻（1310）自建光纖網絡、盡地一鋪做電視、到轉型大搞網購，即使經歷免費電視發牌一役，他依舊我行我素。今次挑機傳統零售業，直言行業沉醉過去30至40年成功經驗，「只要係銅鑼灣、尖沙咀搵到個好的舖頭就得，但呢一種模式其實已經係過去，係好多人都仲未瞓醒。」
訪問當日，氣溫低至10度，將軍澳工業邨的風更冷冽。王維基顯得精神抖擻，「我會覺得點解仍然能夠令我今朝一早彈起身，咁凍都彈起身返工，我諗呢樣嘢係好好玩。好好玩來自於我好多嘢學，好多嘢我唔識。」
做HKTV mall前，他原本連化妝品、護膚品都不會分辨，對消費者的了解也不如同事。「我之前輸咗架，我啲同事話，啲客係鍾意pick up架。我話冇理由，點會唔鍾意送去屋企，鍾意拎咩。」豈料部分地區的實體店提貨量，甚至超出送貨上門，於是力拓住宅區實體店，目前已開設16間。
王維基直指，本港零售業仍停留在傳統想法，認為只要覓得靚舖位便可。對於網購，大公司有能力做、但不關心，小公司缺乏資源、卻很關注。歐美早已出現電商巨頭亞馬遜，內地亦有淘寶、天貓，大至電器、小至餐具，均可網購。「係全世界都行緊，但唔知點解香港的零售商就好似睇唔到、睇唔到、睇唔到。」
HKTV mall開業三年，訂單漸見規模，王維基每每出席論壇，亦如數家珍。2015年初期日均單量僅數百張，去年12月已急增至7600張，單月營業額已過億元。他指，此前策略是招攬大品牌，現時進駐商戶共2700間，囊括一般超市約9成品牌。
作為網購平台，擁有大品牌並不足以與實體商舖競爭，話至此，王維基彷彿sales上身。以洗髮水為例，他指，街舖通常出售最常見的100、200款，佔整個市場8至9成。若消費者求新鮮，想買日韓台新品牌，實體店便未能滿足，因為這些品牌難以打入大型連鎖店。「舖租貴，只可以容納知道會最好賣的貨品。」
HKTV mall嘗試由此突破重圍，著手引入小型品牌。他表示，單計洗髮水已過千款，「我相信香港應該係無任何一間實體店，係會有1400幾種洗頭水比你去選擇。」不過，作為精明生意人，HKTV mall亦只會存放最暢銷的200至300種洗髮水，餘下款式由商戶直接出貨。「坦白講，我哋成個場有18萬種貨物，如果個倉要儲18萬種貨物，會令個營運成本係非常之貴，消費者係好難去接受。」目前，存貨約2萬種，即佔比約為一成。
王維基豪言，HKTV mall發展的阻力只源於平台自身，即執貨時間、貨品選擇等。不少朋友認為香港根本不需要網購，他反駁道，假如香港沒有餐廳能夠烹調出色的法國菜，便斷定港人不愛吃，「咁係香港人唔鍾意食法國菜，定香港煮唔出好好食的法國菜，嗰個係雞同雞蛋的問題。」
所以，他的目標是成為出色的法國菜餐廳。提到HKTV mall大計，他指，當貨品種類達到30至40萬，車隊規模約200至300部；早上11時落單，當晚7時送貨上門時，「我相信成件事會反轉咗。」
「15年前啲人同我講，香港上網邊需要咁快架，邊需要上傳架？」當年沒有Facebook、Snapchat，網絡多用於下傳。香港寬頻率先為住宅區鋪設100M光纖網絡，卻被視為「傻佬」。昔日的傻佬變成今日的魔童，似乎永遠行先一步，王維基說：「如果你要改變呢個世界，你要想像呢個世界十年後會係點。」
