陳敏之、陳展鵬、高海寧、李家鼎等今日喺尖沙嘴出席活動，各自拎心頭好喺市集擺賣，並將賺到嘅錢用嚟做善事，高海寧父母都有現身撐場。
近日流感肆虐，唔少市民為打唔打流感疫苗議論紛紛，早前謝安琪一段批評流感疫苗或有損兒童健康嘅錄音流出，之後黎明又質疑港人正在打「舊疫苗」，都弄得滿城風雨。(相關新聞﹕http://bit.ly/2G5cbou)
陳敏之嘅囝囝雷子樂剛滿1歲，佢話人多地方都唔敢帶個仔出街，而自己亦會袋住消毒藥水同洗手液，保護自己唔可以帶細菌返屋企。
咁敏之有冇帶囝囝打疫苗？佢話﹕「我本來都想，但咁啱感冒唔打得，依家好番。我個仔冇打疫苗，因為老公有男人自己嘅一套諗法，佢覺得注重衞生就得喇，唔想個仔接觸咁多藥。」覺得疫苗冇效？佢話﹕「唔係，我本來都約咗醫生，想偷偷帶個仔去打，但怕有乜事，老公一定鬧！」佢話冇受其他人影響，認為家長要小心分析，佢話﹕「每個小朋友體質唔同，要因應環境，所以兩邊各有支持者，我會尊重老公，大家嘅大前提都係想身體好啫。」
而陳展鵬早前被爆馬來西亞fans活動，門票接近$1,200一張，佢話見面形式仲商討緊。佢仲透露情人節要開工，咁係咪提早同單文柔慶祝？佢笑笑口話﹕「日日都可以慶祝㗎啦！」
 陳敏之話老公唔贊成囝囝打疫苗，自己亦尊重老公意見。 |  敏之認為家長要小心分析。 |  鼎爺真係廿四孝男友，每次活動都帶埋女友現身。 |
 |  高海寧話想出自家製銀器，唔介意抱抱fans速銷。 |  陳展鵬嘅一班fans合共捐咗兩萬蚊。 |
