梁朝偉（偉仔）主演賀歲片《捉妖記2》大年初一上映，亦係偉仔鮮有同太太劉嘉玲賀歲打對台。日前偉仔在灣仔接受媒體訪問，講述拍攝時同卡通精靈合作情況。
偉仔憶述去年底聖誕節拍攝時正值北京嚴寒，零下10幾度通宵拍外景好難頂，除咗惡劣天氣，所有合作都好開心，仲笑笑口話：「估唔到35年前做兒童節目，35年後可以拍一部俾小朋友睇的電影，都幾得意。」
問到同邊個最多對手戲，偉仔笑謂對手戲最多係對空氣演出，佢話：「以前都試過拍藍佈景，但都係拍吊威也飛來飛去，今次同幾隻卡通人物做對手戲，發覺要諗埋佢哋表情，平時見到對手表情會識反應，但今次對住空氣，老闆應該加我人工，做多一份，要做多好多功課。」另一難度係同笨笨(戲中精靈)之間演出，偉仔話：「我同佢同是天涯淪落人，係好兄弟，不時鬥嘴，個心又好鍾意佢，我問導演可唔可以攬住笨笨、瞓喺佢肚上鬧佢，全部都唔得，導演話因為好難畫，最好唔好黐住。」
太太劉嘉玲之前拍攝喜劇《我的情敵女婿》，之後話拍咗喜劇人都開心咗，嘉玲仲自稱演技比老公偉仔好。偉仔又覺得同嘉玲比較邊個演技好啲呢？佢話：「從來冇諗過，因為每個演員都不一樣， 演員有自己風格 ，除非大家演同一個角色。」但論搞笑偉仔自認比嘉玲更勝一籌，仲話：「隨住年齡關係覺得好多事無需太過認真，有時可以幽默下，可以回復到細路仔傻啲，我以前太嚴肅。」突然開竅？偉仔話：「係，唔係一兩件事影響，無需太過認真，唔需要咁計較，笑看人生。」不過嘉玲鍾意偉仔認真定搞笑一面？偉仔即發揮幽默：「兩樣都鍾意，嚴肅中帶小小幽默。」此外，偉仔透露最近拍了幾部電影包括《歐洲攻略》、《風再起時》、《捉妖記2》，稍後要休息一下，今年會減產，想多啲時間陪媽媽。
 日前佢接受傳媒訪問。(攝影：陳慧安) |  佢話今年會減產，希望多啲時間陪阿媽。 |  |
