何超儀同陳子聰結婚14年，不嬲都出相入對非常之咁恩愛，不過前年陳子聰因腸病入院，而超儀停工全力照顧老公，子聰大步檻過後，夫妻感情更勝從前。病癒後佢哋不時被影到拍拖去街，工作方面陳子聰早前有份現身組合廿四味嘅新歌MV，而超儀亦都復工，早排佢仲同樂隊巡迴表演。


其實超儀唔止識音樂，仲好有文學修養，日前佢孖住老公現身銅鑼灣，喺誠品書店打書釘。當晚大約8點半，超儀同老公喺書局入面，各自搵唔同嘅書，子聰主力揀英文書，超儀就去其他書櫃揀書。


估唔到除咗Shopping係女人強項，超儀揀書都一樣快手，瞬間就揀咗成十本書，之後都見佢有走埋去老公度密密斟，子聰揀中咗書，都會同超儀分享下，兩公婆有講有笑。喺書店逗留咗近一個鐘，最後有店員通水佢哋行蹤曝光，兩公婆攞書俾錢後就走人，超儀臨走仲問記者邊間報館㖭！



採訪：朱志聰、黃曉程日前超儀孖住老公現身銅鑼灣，仲喺誠品書店打書釘。
超儀揀書好快手，揀咗約十本書。而老公就去咗隔籬餐廳睇menu。
揀好晒最後由超儀埋單。