賀歲片《西遊記‧女兒國》今晚喺尖沙嘴一間酒店舉行「保良局慈善首映禮」，出席嘅演員包括郭富城、馮紹峰、趙麗穎、梁詠琪（GiGi）及羅仲謙等。
喺活動上有份參演嘅演員逐一上台介紹自己嘅角色，當中GiGi上台時話：「我今次做國師，不過朋友入戲院睇之前都會講我有份做，我怕佢哋認唔到我，今次好榮幸可以參選一個有荷里活級數嘅特技化妝技巧嘅電影，不過拍攝期間我每日8點通告就要2點起身，化妝化足5個幾鐘，嗰陣時就真係好想打導演，不過前晚喺北京見到成果之後我覺得好靚，所有嘢都好值得。」今次GiGi喺戲中嘅造型同本身分別都好大，導演解釋話：「不是想把她弄醜，只是因為角色需要要把她弄得很威嚴的樣子。」戲中今次林志玲反串做男兒身，導演仲用特技將一個男性身體放落去，更安排林志玲同GiGi配成一對，GiGi笑言：「有fans睇完之後問我點解冇咗我同志玲咀嘴嗰幕，其實本身冇㗎，不過今次拍呢套戲除咗化妝之外，最難係要用好多幻想，因為導演喺戲入面放咗好多特技，所以事前要諗定要點做。」
演孫悟空嘅城城喺台上話：「本來拍完上一套，因為個妝太辛苦，我同自己講過話唔會再拍，但係今次導演同電影老闆話四師徒其他三個都會繼續拍，我再睇埋劇本，自己都被打動，唔拍唔得。」其後喺台下接受訪問時，城城話：「趙麗穎成日都會準備好多零食，但係我同謙仔次次都係得個睇字，因為我哋由鼻到嘴都化咗妝，好驚一食嘢會整花。」身邊嘅謙仔話：「每一次化妝都要5、6個鐘，一拍就拍8個鐘，拍完再由5個人用45分鐘卸妝，其實拍嘅過程都唔可以去廁所，今次真係完成咗一個好辛苦嘅任務。」難得今次同一眾合作演員喺香港，城城同謙仔會唔會一盡地主之誼？郭富城話：「因為香港係『島』嚟㗎嘛，都想帶佢哋出海食吓海鮮，不過今次宣傳排得好密，都冇辦法。」
飾演女兒國國王嘅大陸演員趙麗穎同扮演唐僧嘅馮紹峰喺拍攝期間傳出緋聞，不過今日所見兩位似乎冇被影響，仲毫不避嫌，趙麗穎話：「今次是第一次到香港宣傳電影，也是第一次拍大製作的電影，很開心可以跟他們合作。」不過當接受訪問時傳媒問到馮紹峰緋聞嘅事時，馮紹峰即刻尷尬揮手搖頭，喺身邊嘅城城就話：「當然是真的，寫的時候就是真的啦，事實是真是假就要問他本人了。」
 羅仲謙、小瀋陽同馮紹峰以大肚look出場。 |  趙麗穎同馮紹峰喺拍攝期間傳出緋聞，不過今日都冇乜避嫌。 |  梁詠琪今次做女兒國國師。 |
 佢話每日都要用五個鐘化妝，不過見到效果好好都好開心。 |  城城被打動打破自己話唔拍嘅諾言。 |  羅仲謙話化完特技妝連廁所都冇得去。 |
 問到馮紹峰嘅緋聞佢即尷尬搖頭。 |
