《溏心風暴3》有得搞慶功？！係呀，冇搞錯呀。
雖然《溏心3》開播以來收視同口碑都麻麻地，但無綫早前棄用CSM(中國廣視索福瑞媒介研究有限公司)及Kantar Media計法，疑為咗谷大條數，寧願用番舊嘅Nielsen計法，令好耐冇見過「3」字頭收視終於現曙光。(相關新聞﹕http://bit.ly/2BAKdOX)
之前《誇世代》第50集大結局，以7日重溫之「輪迴點擊」收視方法計算，有29.5點，以每一收視點觀眾人數係65,150，即有約190萬人次。而據無綫最新公布嘅收視報告，1月19日播出《溏心3》第40集大結局，成績更上一層樓，有30.8點，約200萬人次。難怪無綫要大肆慶祝一下，今晚會喺將軍一間酒樓搞慶功宴，李司棋、夏雨、關菊英、岑麗香、黃翠如、阮兆祥等都會出席。
而《萬千星輝頒奬典禮2017》仲勁，錄得33.6點收視，約220萬觀眾欣賞。
