近月兩位新聞人物——曾志偉同喺無綫頒獎禮上話「山頭主義」唔好嘅汪明荃（阿姐）、今晚（26日）同薛家燕、吳業坤等現身電視城錄影《吉祥金犬耀保良》，兩人仲一齊受訪。
阿姐嘅「希望山頭主意少啲啲」嘅言論，除咗代表無綫台前幕後嘅心聲之外，亦都係唔少打工仔嘅心聲，但家英哥羅家英就嫌阿姐講得唔夠激，日前佢出席活動時話：「山頭係要去拜，唔同山頭，代表以前有好多大王霸山頭，TVB好多寨主，嗰啲係賊頭……」咁阿姐又點睇呢？
阿姐話，台慶頒獎禮當晚佢講嘅「山頭文化」，係隨心講，唔係照稿讀。咁公司有冇Scan過？當然都係冇嘅。邊個敢呀？志偉都話：「公司冇人夠膽審阿姐喎！」咁你撐唔撐阿姐呢番言論？梗係buy啦：「佢講嘅嘢點能夠唔認同？係佢先至講得到。」仲話以阿姐對無綫嘅了解，由佢講更加有說服力。
喺台上講呢番言論時，鏡頭見一眾藝員排排企都唔敢俾反應，得家燕姐笑咪咪拍手。阿姐話，事後唔少同事都好多謝佢敢言：「間間公司都有山頭文化0架啦！」但佢話唔覺藝員當時唔敢俾反應喎：「佢哋喺度拍手同笑0架！」
阿姐話，佢覺得新管理層係有heart嘅，而且係想做得更加好，呢個時候曾志偉突然爆一句：「係想將山頭文化做得更好咋嘩？哈哈！」
 |  |  |
 上次阿姐話希望TVB少啲山頭文化。(電視圖片) |
