蔡思貝、湯怡、崔碧珈、林芊妤（Coffee）、彭浩翔、馮允謙、徐榮、C AllStar成員釗鋒和On仔等，昨日順利完成渣馬半馬賽事，成績最好是1小時37分40秒的馮允謙，而蔡思貝以1小時47分44秒完成，是女藝人中成績最好（詳見附表）。
蔡思貝賽後表示跟跑步教練吳輝揚學跑十多年，之前在外國讀書時也會回港參賽，她說：「入咗娛樂圈後，瞓覺都冇時間，家我26歲，但身體好似3、40歲，因為唔夠運動，喺廠經常吹冷氣，個人好虛，所以趁後生操吓體能。」問明年可會參加全馬？她表示：「全馬係唔可以僥倖，要做足準備，噚晚眼光光，個心卜卜跳，好緊張，好想快啲完成，所以係興奮到瞓唔着。」
第二年跑半馬的湯怡以1小時55分52秒完成，比往年快了10分鐘，她有意明年挑戰全馬，問如果她明年與男友洪卓立一起跑全馬，會否順道叫男友求婚？她甜笑說：「我跑完之後就向佢求婚啦，其實叫佢出年喺終點等我都得，咁會好似有個目標。」
崔碧珈比往年慢了近19分鐘，早有心理準備成績不及往年的她說：「前一、兩日我夜晚喺公園諗住拉筋郁動吓，途中要避狗屎就扭開，點知就着地流血扭親，膝頭又擦損，條褲磨擦會痛，唔急得只能量力而為，但唔會放棄。」昨日她到達場地後發現忘記帶號碼牌，結果要找家人飛的送來，認真大懵。
彭浩翔說：「最難係葵涌嗰條路，之前都有操練，平時都係跑10K同11K，好開心有啲大學生擺檔口畀參賽者食蕃茄同提子補充糖份，仲有葡撻，不過我覺得太過份喇！」
昨日參加全馬的藝人不多，只有胡諾言、「肯雅徐」徐濠縈、周子駒、DJ Donald唐劍康和細So蘇耀宗等，當中以胡諾言成績最好，以3小時43分42秒完成，至於兩年沒跑渣馬的阿徐，昨日就歎慢板抱着輕鬆心情去跑，最終以4小時16分33秒完成。
阿徐說：「傾住偈去跑，同幾個朋友，頭先喺西隧口見到自己個廣告，有停低影相，又有同啲參賽fans影吓相，今日嘅時間未必同平時一樣咁快，平時應該快啲，今日冇睇時間去跑。今日都係有啲辛苦，雖然話成程有輕鬆吹水。」記者笑指吹水功無人能及得上她老公陳奕迅，她即笑言：「佢唔跑得，因為大家唔同公司，即係代言嗰個，囡囡本身都嚟，不過怕混亂，今朝都畀咗個擁抱我，以示支持。」
胡諾言今年成績比往年好，快了14分鐘，但他表示明年未必再參與，希望等兒子長大後可以一起參與。他又表示今次比參賽其實有驚無險：「本來噚晚10點瞓覺，點知阿仔係度喊，阿女又叫我，搞到1點先瞓，4點要嚟到準備，不過今年有呢個好成績，當係一個交代，我希望一眾crazy runner兄弟姊妹今晚頒獎禮可以得償所願。」
參加十公里賽事藝人有林奕匡、Super Girls成員吳嘉熙、無綫藝人余德丞及鄧佩儀，眾人中以余德丞的49分鐘成績最好。余德丞昨日凌晨4時許已抵達北角東廊賽事現場拉筋熱身，他賽前受訪時表示第二次參加渣馬：「14年第一次跑，當時成績係52分鐘，好多女仔都快過我，事隔4年，想再挑戰自己。」
首次參加十公里賽事的鄧佩儀，以1小時2分2秒完成，她說：「我預咗個半鐘，因為訓練嘅時候，我跑唔過6K，可能今日天氣同環境，又有大班人一齊跑，令我好興奮，下年嘅目標係要早啲起身霸頭位，因為太多人，我嘥咗5至10分鐘時間。」會否再挑戰十公里？她說：「10K對我都好勉強，如果要參加半馬或者全馬，就要花更多時間，前日我感冒，食藥加休息，今朝氣管都還可以。」
