「我都係等咗25年啫，只要你一日唔放棄，始終有機會做到。」93年出第一隻碟，18年4月28日，終於等到上紅館開騷嘅趙學而說：「主題係《Right on time》，與其話時間啱啱好，我想帶畀大家訊息，唔可以放棄，咁多年我喺呢行無論高低起伏，有幾多次攞到好成績，然後再一次跌落谷底，甚至乎喺我生活、人生、健康狀況起伏，我覺得係一本好好嘅指引書，只要你唔好放棄，堅持想去嘅地方，路唔止得一條。」
學而雖然曾經鑽牛角尖，但佢係一個頭腦清晰嘅女子，最終搵到自己嘅路：「我入行時係一個好忟憎嘅人，嗰時我會覺得，究竟係乜問題？係咪我嘅問題？定幫我做嘢嘅人有問題？我明明可以得到嘅嘢，點解仲未得到？但人會長大，經歷越多，再沉澱消化，你會發覺唔係咁簡單一回事，有時越着緊越走，反而放輕鬆會攞到好成績，一直行到今年可以去到紅館。」
處女紅館騷請了何炳做音樂總監，兩人合作過Hi-Fi碟：「佢清楚我音樂風格，上次九展騷冇唱嘅都會唱，例如《再見了》、《浪漫就是》，仲有part童年回憶揀咗卡通片嘅歌，《長腿叔叔》、《IQ博士》、《千年女王》，亦知道觀眾想我請佢哋想睇嘅嘉賓，譬如我啲朋友陳奕迅（Eason），如果Eason肯嚟，情願佢喺觀眾席睇我唱歌，嘉賓希望係音樂或演戲合作過嘅人。」
學而喺劇集《皆大歡喜》扮演「林玉露」角色出位，會唔會請《皆》演員做嘉賓？佢笑笑話：「相信觀眾絕對希望得到超級無敵十字步，哈哈哈！但要咁多人出席好難，林文龍要顧電影，謝天華喺大陸好多騷，家燕姐喺香港又好忙，行姐（陳彥行）做電台嘢，苑瓊丹又好難搵，唯獨阮兆祥喺TVB，不過佢好忙拍劇，如果成事都好玩，發吓夢先啦！」學而數了一大串《皆》劇演員，卻絕口不提傳反面嘅梅小惠，問兩人依然冇聯絡？學而坦言：「其實一直都冇。」
開騷請小惠嚟睇化恩怨？學而口直心快：「有乜要化？我一直都冇恩怨㗎，其實唔關我事，我唔會刻意去請，好似唔應該我去做呢樣嘢，我唔知人哋仲嬲唔嬲㗎嘛，如果我開口，人哋仲嬲咁點呢？我冇謂令到自己好似唔知點，其實o依家斷估啫，我唔知人哋乜嘢心態，冇乜必要咪盡量唔使，自己開心咪得，如果佢開心想嚟，我都歡迎㗎。」
 攝影：沈健程、攝錄：廖達燊 |  等咗25年趙學而終於等到上紅館開騷。 |  |
 處女紅館騷請了何炳做音樂總監，學而就話對方了解佢嘅音樂。 |  |  講到嘉賓，學而就數晒《皆大歡喜》所有藝員，唯獨唔提梅小惠。 |
 有指趙學而同梅小惠拍《皆大歡喜》時反目。 |  學而前年開騷，Eason同太太都係坐上客。 |
