繼《大鬧天宮》、《孫悟空三打白骨精》後，郭富城同羅仲謙繼續接演2018賀歲片《西遊記女兒國》，日前佢哋聯同導演鄭保瑞喺尖沙嘴接受訪問，城城指呢部戲耗資5億元，鄭保瑞直認真係好貴，演員片酬佔好多﹖鄭保瑞笑住話：「一定同之前嗰部唔同。」城城打圓場表示最重要係拍好部戲。
城城喺《孫悟空三打白骨精》及《西遊記女兒國》都係飾演孫悟空，佢話兩者分別好大：「其實我係喜劇演員，阿瑞今次搵我做一個有喜感嘅孫悟空，而且我又抵用，識打又有喜感嘅人係唔多，所以我係最適合嘅選擇。」外型有冇唔同﹖城城話：「係有變化，第一次用咗12個鐘去試造型，大家都好滿意，導演想今次嘅孫悟空比較接近猴子樣，多過人樣。」
再次演繹同一個人物，城城表示好難：「以呢個樣去表現喜感係難，同埋上次嘅戲份好沉重，所以我講過唔再演，但我身痕，係要折磨自己先痛快，其實只係過咗兩年，我唔記得咗嗰種痛苦啫，不過當我簽咗約，第一日去到現場，見番個化妝師，我想即刻調頭走，我真係想唔做，我驚咗，即刻打畀小美話『我想唔做』，佢話唔得，其實搵第二個做都好容易，但阿瑞好體諒我，知我做呢個角色會好忟憎，加上公司同我講俾啲時間去適應，我咪挑戰自己，我唔做，你搵邊個做吖！」如果再開拍，下次仲做唔做孫悟空呢個角色﹖城城好快咁話：「我做唐僧！」
由於要黐毛扮孫悟空，鄭保瑞表示知道城城嘅皮肉之苦：「大家嘗試用張濕咗水嘅厠紙，撻喺塊面12個鐘，但佢黐毛係冇水份，直接黐喺皮膚，抖唔到氣架，好似蟻咬咁，我好明白佢嘅情緒，唯有喺拍攝上盡量係順利。」城城表示要隨身袋住敏感藥膏，另一對佢有困擾就係要箍金剛圈，佢話：「一脹一熱，我就開始頭痛，呢啲都係我哋皮肉之苦。」
鄭保瑞又指羅仲謙演繹沙僧一角，由於要着緊身肌肉衫，緊得連手指都發紫，感覺極不好受，羅仲謙話：「最辛苦係冇得大大，4個月唔可以令自己『搞肚痛』，要控制飲食，因為件衫一着一除要個幾鐘。」鄭保瑞表示：「當佢郁，肌肉衫都會郁，緊緻程度要同皮膚一樣，崩緊咗，手會脹，特技化妝師見到咁會stop，唔俾我繼續拍，一定要阿謙除衫，如果唔係有危險。」問到點樣發紫﹖羅仲謙笑稱：「篤到自己有反應就唔使驚。」講到《大鬧天宮》、《孫悟空三打白骨精》收到超過10億票房，城城立即笑住話：「今次30億算啦！」
現時城城既為人夫，又係爸爸，接戲會唔會較以前錫身﹖佢話：「作為爸爸，更加覺得家庭好重要，唔單只小朋友，對我家人、太太都要照顧，我知佢好辛苦，以前我唔知，當有小朋友，太太係仲辛苦，我作為一家之主，我有工作在身嘅時候，我要專業去做，俾一個榜樣我下一代睇到，我反而覺得係更加專注工作，做唔做危險動作，我係唔會改變，反而自己心態係會更加好好對待自己工作。」
採訪：黃曉妍
場地：帝樂文娜公館DaDa Bar
郭富城
服裝：Comme des Garson
髮型：Ian Wong @ ii salon
化妝：Terry Yu
羅仲謙
服裝 : Polo Ralph Lauren
化妝: Leo Tam@Annie G Chan
髮型: Jan Chiu@IL Colpo(PP)
