【更新FNC發聲明內容】
韓國SBS電視台噚晚喺新聞報道有一名知名偶像組合嘅A成員，涉嫌享特權，喺冇正式參加面試就成功被慶熙大學研究生院錄取，A成員前年兩次冇參加面試兼僅得0分成績，但佢最終都獲得合格。警方亦介入調查，噚日就事件立案調查A成員及B教授，當中B教授已被拘捕，據警了解仍有其他涉嫌人士牽涉其中。
根據今日韓媒指A成員係某人氣樂隊嘅成員，並先通過電視劇被大家所認識，之後先作為樂隊成員出道，並大受歡迎，同時亦有演戲及主持。
而事件喺網上引起軒然大波，網民都紛紛就事件搜索邊位係當事人，由於噚日只係話A某係知名偶像組合成員，所以唔少網民就猜測多位就讀慶熙大學嘅團體成員，如B1A4嘅Zico，不過隨住今日韓媒報道該成員先拍劇而為人認識後，網民嘅範圍就縮緊，當中矛頭就直指人氣樂隊CNBLUE嘅鄭容和，韓媒《每日經濟》更獨家報道鄭容和就係事件嘅當事人，並指佢前年申請慶熙大學普通大學院博士課程，但未經正式面試就取得入學資格，《每日經濟》曾向其所屬FCN事務所問回應，但FNC方面就拒絕所有聯繫。
鄭容和於2009年參與人氣韓劇《原來是美男》而為人認識，翌年才以CNBLUE成員出道，就讀於慶熙網路大學。負責今次案件嘅首爾地方員警廳智慧犯罪搜查隊相關負責人就向傳媒表示，喺考試中違規行為涉嫌業務妨礙罪，警方已傳召了當事人進行調查。
而被爆享特權後，鄭容和所屬嘅FNC方面就發聲明，除了承認係主角外，亦就事件道歉，並透露已接受警方調查，又表示：「鄭容和喺校方積極推薦下，參加咗去年1月嘅慶熙大學應用藝術學科博士研究所嘅考試，並取得合格。」FNC方面就指藝人嘅行程由公司安排，鄭容和喺今次事件上，無論喺入學事件或是應試文件等都由公司同學校接觸及處理。
