27歲前新聞主播陳嘉倩早前自爆與「案底男」陳志遠(Stephen)分手，但之後爆出更多是非，聲稱係陳志遠「正印」嘅大台小花朱婉禎哭訴被陳嘉倩搶男友，陳嘉倩仲要凌晨whatsapp求復合，非常死纏難打。另一邊廂，嘉倩BB自覺受委屈，上周二撰寫千字文，稱分手後受到連串威嚇、滋擾，亦有人揚言要每日跟蹤佢，最後報警備案，還稱自己沒有帶眼識人。(相關新聞﹕http://bit.ly/2FAvYgr)
兩女爭一男，永遠都係得個「嬲」字。上周四(11號)，《蘋果》喺尖東噴水池附近一間露天酒吧發現陳志遠行蹤。當日下午約三點，陳志遠相約一名男友人high tea，陳志遠穿上一件杏色乾濕褸，戴黑超，仲gel咗個飛機頭，造型十足80年代嘅Mark哥。
唔知最近係咪因為有女人為佢爭風呷醋，陳志遠全程都樣都好愁，仲叫咗一杯大啤酒加少少食物，同友人吹水近一小時後離開。
陳志遠同友人準備行去櫃員機撳錢之際，記者趁機會去前訪問，見佢都有啲驚惶失措，問佢朋友可唔可以錄音。之後陳志遠亦好合作行埋一邊接受記者訪問，內容如下﹕
(陳志遠﹕陳 記者﹕記)
記﹕有冇同陳嘉倩聯絡？
陳﹕冇。
記﹕有冇騷擾佢？
陳﹕我諗我冇騷擾過佢啦，首先，我都係聽佢講，我先知佢畀人騷擾，亦都睇到報道啦，我騷擾佢做乜嘢呀？我亦都唔想畀人誤會又好，點都好，我係騷擾佢，其次，我同佢係和平咁樣分開架嘛，騷擾過佢乜嘢呢，係咪呀？
記﹕朱婉禎撐你喎，你哋現在關係點？
陳﹕感情事我唔回應喇，真係，係(不斷點頭)
記﹕網民封你做新一代賤男？
陳﹕其實我點回應都好，我相信唔同時候都有唔同嘅花名，我諗首先我唔會理會人哋點樣講，點做點行都會有人講，我唔會理人哋點樣講。(強顏歡笑)
陳志遠未有為一腳踏兩船解話，訪問後與友人去停車場攞車離開。據知陳志遠家底都唔錯，本身係圍村男，屋企人做沉香生意；而陳金華則做賭業生意，堂兄更在外國有合法賭牌，但與Stephen一向少接觸，只係親戚。至於其女友朱婉禎亦非一般嘅無綫二打六，朱婉禎嘅爸爸係上市公司主席，與陳志遠都可以話係門當戶對。
精選娛聞，喺晒《娛果》
http://fb.com/appledailyent
