41歲嘅楊張新悅（Nicola)喺07年與現職區議員嘅楊哲安結婚，先後誕下三個女，分別係8歲嘅Lucy、7歲嘅Lily同3歲嘅Leah，Nicola婚後淡出娛樂圈，專心相夫教女。


《蘋果》讀者林小姐日前透過「爆相爆片」表示於上周日(7號)喺銅鑼灣嘅街邊攤檔見到張新悅一家五口，當時張新悅陪住三個女一齊揀玩具，而老公就一直企喺旁邊耐心等待。林小姐話﹕「當時晚上七點左右，見佢哋嘅小朋友都好乖，媽咪喺旁邊畀意見，佢哋揀咗大約15分鐘，最後每人有一份砌屋仔嘅玩具，價錢都係百幾二百蚊左右，唔係太貴。」


張新悅嘅老公楊哲安曾任教育局政治助理，而張新悅就喺2012年完成香港大學環境管理理學碩士課程。張新悅經常都話教小朋友注重品德多過學業，而且非常重視環保；早前佢接受黎燕珊節目訪問時，透露三個女會着親友贈送嘅二手衫，平時會限制屋企人瞓覺時先開冷氣，洗手用一兜水，連沖涼都會畀三個女先用浴缸，之後佢加啲水，就輪到佢同老公沖，五個人沖完晒就會再用啲水嚟洗地或沖廁，真係好環保。(相關新聞﹕http://bit.ly/2qWcyiR)


當日見張新悅三個女買完玩具後都冇用膠袋或紙袋載住，只係小小雙手拎住玩具，但個樣就似乎好開心，因為有新玩具玩。而爸爸楊哲安雖然着住套西裝，但都都拎住一個綠色環保袋，似乎張新悅家教真係好好。





張新悅一家都好環保，買嘢唔使用膠袋，老公仲唔介意幫好拎環保袋添。(圖片由讀者林小姐提供)小朋友見到玩具都雙眼發光，好小心揀禮物。(圖片由讀者林小姐提供)
老公最初都有畀吓意見，但小朋友都係鍾意自己話事。(圖片由讀者林小姐提供)三個小朋友滿載而歸。(圖片由讀者林小姐提供)張新悅老公早前選區議員，一家人都有支持。(資料圖片)
(資料圖片)一家五口(資料圖片)