現年37歲嘅陳冠希早喺2000年出道，咁多年嚟陸陸續續都有唔少佢言行火爆嘅新聞出現，不過自從上年大陸女模秦舒培幫佢生咗個囡囡Alaia之後，即刻修心養性變身做好爸爸，仲不時喺IG晒幸福放閃。
唔知係唔係因為咁嘅關係，陳冠希好似真係被秦舒培感染咗，藝術細胞出晒嚟，除咗周不時會同秦舒培去下藝術展之外，今次陳冠希仲自己搞埋藝術創作，大玩行為藝術。
藝術嘅嘢好多時都真係睇你點睇，陳冠希今次喺北京尤倫斯當代藝術中心舉行展覽，將自己變為藝術品，坐喺個玻璃房當中任影任望唔嬲。這場限時行為藝術作品名為《我拉和吃都在這兒》。房入面只有簡單幾張梳化同工作枱，由一名工作人員陪同嘅陳冠希就喺房內活動，睇落陳冠希心情都唔錯，觀眾上前影相嘅時候都有報以微笑回應。
介紹番，呢個展覽個名叫「音術」—— 尤倫斯當代藝術中心同Etalier des Chene——即係陳冠希，以及摩登天空合作，展期由噚日開始至下月11號。
睇番介紹，Etalier des Chene早於2014年已經同UCCA合作做展覽，喺UCCA展覽空間搭建起一個玻璃房間，都係進行三日行為展示，以探討「在公眾審視之下生活甚至睡眠的無盡壓力」、「做我自己」。今次比較唔同嘅係，陳冠希仲創作咗六件作品，有反思狗仔文化嘅《以牙還牙》，同埋獻俾秦舒培嘅《雅存》等等。
原來呢，陳冠希一直都有收藏藝術品，據報道所講，而且眼光一向好準。佢喺《音術》記招上都話：「我收藏的初衷不是為了投資。所有藝術品將來都屬於女兒，她很幸運，我希望這些藏品可以讓她一直生活得不錯。」
 自從上年大陸女模秦舒培幫陳冠希生咗個囡囡Alaia之後，陳冠希即刻修心養性變身做好爸爸。（IG圖片） |  唔知係唔係因為咁嘅關係，陳冠希好似真係被秦舒培感染咗，藝術細胞出晒嚟。（微博圖片） |  陳冠希今次喺北京尤倫斯當代藝術中心搞展覽，將自己變為藝術品。（微博圖片） |
 坐喺個玻璃房當中任影任望唔嬲。（微博圖片） |  |
