電影《藍天白雲》係鄧麗欣(Stephy)同梁雍婷(Rachel)第一次合作，電影早前喺釜山國際電影節舉行咗世界首映，得到近乎一面倒叫好嘅評價，故事講述一名女警偵查一宗少女弒親案，從中發掘了解少女嘅動機，從而探討所謂家庭以及人性嘅議題。戲中飾演警官嘅Stephy，喺調查Rachel殺人動機時，慢慢發現所有一切都可以同自身互相印證，Stephy話：「戲入面有個好老公照顧腦退化嘅父親，但係其實角色自己內心都有好多疑問，喺Rachel身上見到自己嘅影子，套戲會探討人性較多，呢個問題其實任何階級都要面對，其實心入面嘅問題最難解決，唔同人睇會有唔同感受，電影有好多留白畀大家去思考。」
有人話今年係Stephy年，先有杜汶澤導演嘅《空手道》、再有《女士復仇》，Stephy喺兩部作品當中都有脫胎換骨嘅感覺，不過佢就話係Timing問題：「啲人話呢期你拍好多戲喎，其實今次呢套係兩年前拍。」講到有人用開竅嚟形容近日嘅Stephy，佢就覺得係兩樣嘢：「其實我演每部戲都係一個好獨立嘅個體，唔會因為《藍天白雲》而出現《空手道》嘅平川真理，我覺得唔關事。但係亦都有機會喺我嘅生命中出現《藍天白雲》之後，我嘅想法、潛意識都會被影響，令我行咗呢條路，其實演員呢個身份喺同自己一齊成長。」
不過Stephy覺得電影拍得再好，台前幕後再有心之餘，都要資源同支持：「自己睇返今次嘅作品，情緒都好複雜，或者觀眾睇嘅時候唔好記住呢個係我，亦唔好用之前某一個角色、某一位導演去比較，希望大家都可以抽離，冇話演商業片就唔好，演藝術片就好，我認為每一部戲都有靈魂，冇分好同唔好，因為每一部戲我都有付出真誠同努力。《藍天白雲》好需要觀眾支持，先可以繼續拍啲低成本嘅戲。如果唔係又繼續做一啲商業片，到時大家又話唔好，話想睇一啲誠意制作，最終會變成一個惡性循環。」
張經緯講到同Rachel面試時，揀咗希臘悲劇《伊底帕斯王》俾佢試：「我係想睇到底你有冇準備，同understand戲劇呢樣嘢，最終睇到好多。雍婷係一個天才，佢做一個男人角色，開頭佢演得好Man，我話唔啱，佢即場再演過，然後聲調啊全部改變晒，最後個場戲，兩行眼淚就咁流出嚟。」現年24歲嘅Rachel，拍攝《藍天白雲》時仍未喺浸大表演系畢業，戲中角色喺草根家庭長大，一家人住喺鐵皮屋內，因為想離開家庭，而想父母消失。佢話作為新人可以獲得讚賞係好鼓舞：「拍呢套戲嗰陣諗，呢套戲或者我演嘅角色可以帶到咩畀觀眾。作為電影工作者，最想係觀眾動容，已經係最開心。」佢話學校演出同真實拍攝嘅分別，就係學校可以容許做得唔好，會有空間俾你由錯誤中學習，但係拍電影有台前幕後，演戲亦唔係睇一個人。
場地提供：糖室
Stephy
Hair: Euling Chow @ IL COLPO TST
Makeup: Cyrus Lee
Outfit: Sportmax
Shoes: Juicy Couture
Rachel
Hair : Oscar Ngan @ii Alchemy
Makeup : Yvonne Yeung
精選娛聞，喺晒《娛果》
http://fb.com/appledailyent
