傅嘉莉（Kelly）噚日33歲生日，今日佢喺觀塘搞生日會，同近百fans補祝，佔半數以上都係男fans，Kelly特登搵人製作咗個6層高嘅蛋糕，喺一眾fans前輕說過去一年往事時感觸落淚，含淚多謝佢哋嘅支持。
Kelly透露噚日同好朋友一齊度過，今次係第3次同fans過生日，人數比往年多，所以做咗個多層蛋糕有特別意義，佢話：「多謝fans沿途陪我一齊，喺演藝生涯都有不少崎嶇，希望可以一齊行過，呢幾年作品、好多緋聞報道咗出嚟，無論我花幾多努力都好似白廢咗，希望今年唔會再有緋聞，呢個係我生日願望之一，大家可以focus我工作。上年拍咗《特技人》，今年會拍《包青天再起風雲》，都係一個幾耳目一新嘅Kelly，除咗要打之外，仲要騎馬、落水，3月會去橫店拍攝，希望順順利利。」
今年元旦Kelly冇工開，被《蘋果》目擊四周圍去廟宇拜神（新聞連結：http://bit.ly/2ABzFP0
），問佢今次拜神係驅緋聞定搵真姻緣？Kelly話：「拜神係屋企傳統，每年都會去幾次，1月1號係同屋企人去拜神保平安。」又話加入無綫兩年幾，喺電視圈都係新人，希望多啲成績回饋公司，今年公司都畀咗最大嘅禮物，就係提名女配角獎項。
Kelly話之前被指一腳踏兩船，o依家損傷慘重要求神庇護：「好多嘢唔係自己可以控制到，我想專注事業，新一年希望呢啲是非遠離我，我會更加努力工作；而另一個生日願望係可以凍齡，希望可以保持年年22歲咁樣，見到好多偶像都係咁keep得好好。」
 （攝影：陳慧安） |  傅嘉莉開生日會補祝噚日33歲生日 |  佢話生日願望係冇緋聞 |
 講到激動位，喊晒口。 |  好彩有fans抱抱錫番 |  收花咪又開心番晒 |
