48歲嘅王菲同37歲嘅謝霆鋒復合3年多，早前大陸傳媒瘋傳王菲有喜，但一直未得當時人證實。噚日元旦，網上有人發佈一張王菲與一大班朋友聚會嘅相片，眾人都拎住酒杯，一齊慶祝新年。


唔少網民都憑住呢一張相，就好似偵探咁智破呢個謎團，覺得王菲唔係真係有喜。向來隨性嘅阿菲與好友聚會都冇刻意化妝或梳靚頭，相中見佢着住一件針織冷衫，雙手依然纖瘦，好悠閒咁坐咗喺地下，用手托住個頭，估計有咗嘅女人應該唔會坐地下。而王菲嘅肚皮亦唔覺凸起，喺王菲前仲見到一包香煙放喺枱面，各種蛛絲馬跡，網民都覺得王菲唔似係懷孕。


霆鋒早前返香港喺機場時，被問到點同王菲慶祝聖誕節及新年，佢都係好隨意咁話﹕「日日都係節日。」(相關新聞﹕http://bit.ly/2lFaLbS)結果元旦冇陪女朋友一齊慶祝，而係出席咗叱咤頒獎典禮，帶畀樂迷唔少驚喜。




(右﹕陳俊強攝)元旦王菲約埋大班好友一齊慶祝。(網絡圖片)(資料圖片)
王菲同霆鋒復合已3年多。(網絡圖片)