今日陳志雲為亞視主持嘅《百萬富翁2018》慈善版喺大埔亞視總台錄影頭3集節目，大約頭上8點半錄影完畢。其中有份參賽嘅鄧兆尊就透露：「答到7題，第8題唔敢挑戰，都係第一條保險線6,000蚊，啲題目都幾難。」
講到早前梁思浩話會喺新節目請兆尊同祥嫂上去，而兆尊早前已經話唔會將家事嚟做宣傳，兆尊今日再講：「識佢咁多年，乜都誇大十倍gimmick嘅嘢冇問題。(觀眾期待你哋同場喎！)你哋期待啫我好辛苦o架！呢個角色好難做，我做唔到，不過我同祥嫂冇嘢，亦唔係仇人，我同佢有電話聯絡，佢叫我出鏡我會出，同場冇問題。我係細，尊卑要分，有本事佢叫到祥嫂上嚟我咪上囉，我都會嚟，最緊要觀眾開心，不過思浩未搵我。」
王喜同雨僑一齊接受訪問，王喜就話：「我啲成績真係強差人意，掛住玩唔記得用錦囊。」佢透露去到第一條保險線6,000蚊，王喜又大讚雨僑叻女：「唔止係才女，知識就係力量。(陳志雲冇打眼識俾你咩？)o依家4K年代打咩眼識呀，連提我用錦囊都冇提呀，我真係恨鐵不成鋼。」之後王喜向雨僑講笑話：「你就好啦陳生o依家錫晒你喇！」
至於雨僑就話自己去到6,000蚊嘅保險線：「因為今日做慈善，所以都會搏下。」而第二、三集《百萬富翁2018》慈善版一共籌到6萬8千元，而善款就會捐贈予善寧會。
