曾參加韓國綜藝節目《PRODUCE 101》嘅安炯燮和李義雄，噚日首度襲港，晚上去到觀塘apm出席「平安夜狂歡倒數派對之炯燮x義雄簽唱會」活動，跟港迷倒數迎聖誕，吸引大批粉絲捧場。
晚上11時20分安炯燮和李義雄一現身即大跳聖誕歌賣萌。是次來港出席活動，安炯燮大讚香港係最好嘅觀光勝地，有好多美食以及好有特色。不過早前二人秘密來港拍MV，義雄就話當時天氣又熱又濕，都幾辛苦。提到香港美食，安炯燮就最愛蛋撻，義雄就係點心。
至於想合作嘅亞洲明星，義雄話睇過《少林足球》，想跟周星馳合作，安炯燮就好鍾意《不能說的秘密》嘅周杰倫，想同對方合作。
之後二人跟幸運粉絲於台上玩遊戲，又跳舞又擺出唔同甫士合照，當中安炯燮做瑜伽甫做到瞓地，連佢自己事後都尷尬笑咗笑。隨後二人於現場演唱歌曲及跟粉絲一齊倒數，祝大家都健健康康。
於訪問環節中，安炯燮話因為係成年前最後一個聖誕，所以覺得好難忘，不過因為太忙，所以未有時間為義雄準備禮物。二人又話睇過《星球大戰》（Star Wars），安炯燮最鍾意黑武士，義雄就最鍾意尤達大師。
 |  二人大擺《星球大戰》嘅甫士 |  |
 於台上跳舞賣萌 |  |  |
 |
