噚晚平安夜應該係一個普天同慶嘅日子，不過張振朗就過咗個「不平安的平安夜」。


佢今日凌晨Update Ig，相中佢坐咗喺救護車入面，似乎係受咗傷。佢仲留言話：「一個不平安的平安夜，何解三個帳篷會在天台飛落街？為何沒有人把帳篷綁好？如果打中一個小朋友他一定會冇命。今天不幸運的傷者是我，最擔心的是為左一個角色我每天唔訓教(瞓覺)都去操練，現在一個意外把我弄傷了，左腳膝頭，背脊很痛，我很擔心因為咁而影響我既(嘅)工作。希望有關人士可以正視這個很嚴重的問題！」


被天降帳篷整親，張振朗同時仲upload兩張相，一張見到兩個帳篷反轉咗喺花糟邊，而另一張就見到有3個男人拉住個疑似差啲跌落碼頭嘅帳篷。相信帳篷都有返咁上下重量，有如張振朗所講如果打中一個小朋友真係可大可小。


張振朗拍劇意外受傷，佢今日接受傳媒訪問時，透露已經出院回家中休息，但行動仍然有點不便。佢話﹕「我噚日敷咗啲藥，已經照咗X光，冇裂骨，抖一星期後，再睇吓有冇傷肋，主要係撞到背脊、腰同膝頭，行動唔係十分方便，條腰係彎唔到嘅，好痛。」


張振朗話遲啲要再覆診，現在最擔心係影響拍攝中嘅《包青天》，佢話﹕「展昭一角我落咗好多苦功，睇吓康復成點啦，因為真係有好多動作場面，彎唔到就真係做唔到，遲啲要同公司傾吓。」佢話慶幸當時有避開，唔係情況應該仲嚴重，佢話﹕「如果冇避，可能擊中面、手同心口，中咗就好嚴重，現在算係不幸中之大幸。(會否向商場追究？容後再談，關心身體先。」


希望張振朗早日康復啦！



張振朗凌晨Update Ig，佢話被天降帳篷整親。相中佢坐咗喺白車。