日前陳志雲喺葵涌同甄詠蓓及音樂人林家謙為網台「OpenSky.tv」錄影《大開眼界》，呢集佢哋講下旅遊同飲食節目，志雲扮霆鋒chok住畫花，並提及到「魚有魚味、雞有雞味」經典對白飲食節目，佢話當年黃麗梅主持《中國八大名菜》曾成無綫競爭對手，收視高企。
志雲披露節目中會講電視狀況行規同潛規則，仲分享咗六叔邵逸夫及邵方逸華女士喜愛睇婦女及非戲劇節目習慣，志雲話：「方姐由04年多咗參與電視台工作，我會分享佢體會同觀察，方姐睇好多非戲劇節目，劇集反而少睇，因為佢覺得有一定水準同叫座力，以往同佢開會好辛苦，我要睇埋劇集，佢唔使睇，佢睇好多亞視同無綫非戲劇節目，每逢週一開會我就會好驚，例如佢會問呢個星期三有個節目有邊個邊個？我就好似要填充題咁諗答案，好驚唔夠佢快同深入。」
而另一話題志雲會講返選美節目同方小姐溝通，志雲話：「有次紅館選美都未睇到一半，方姐親自帶我走紅館，問我:『你睇下呢啲角度觀眾點會睇得清楚！』我解釋我哋做電視，主要係個螢幕框框，佢話你做得就要預人睇到。記得阿Sir(六叔)至理名言金句，我哋開會一定會交代製作費幾多，個景幾堂皇幾靚，阿Sir話做個節目唔係用幾多錢，個景有幾靚，係香港小姐參賽佳麗質素，係咪做到好節目，唔係大堆頭多錢就代表好， 即使成本低有構思同創意好重要。」
基於六叔同六嬸都熱愛睇節目，志雲都不敢怠慢，有次六叔向志雲提議搞香港Mr. Bean。志雲話：「阿Sir睇好多節目，好與唔好都睇，想知人哋有乜好與唔好，下晝嘅婦女節目唔好以為非黃金時間可以求其做，呢啲時間佢會坐住睇電視，仲會問我點解個節目無端端有人唱歌、邊個嚟㗎？無綫以往成功，領導層各面都熱愛呢行，呢啲依家做緊呢個行業嘅人，要激活呢個熱情，唔係只打份工。」
大台節目今非昔比，志雲指現今選擇多，觀眾要求高咗，成績變得唔係咁理想，但遇到批評係好事。志雲話：「好似我去亞視做節目啲人話我倒戈相向，其實無綫唔應該咁睇，呢行要共存共榮，唔係鬥個你死我活，整個區域競爭好大，內地、韓國、日本、台灣都係對手。」
 |  攝影：林賓尼 |  基於六叔同六嬸都熱愛睇節目，志雲都不敢怠慢 |
 |  志雲又話呢行要共存共榮，唔係鬥個你死我活 |
