袁彩雲喺溫哥華回流為奇妙電視主持飲食節目《喜出望外2018為你Cooking》，日前喺觀塘錄影，邀請咗螢幕情侶唐文龍做嘉賓一齊下廚，以龍蝦炮製《金香海龍皇》，兩人都有烹餁底子，手起刀落斬龍蝦無難度。
袁彩雲老公開餐館，但佢嘅廚藝係自小培養，佢話：「我鍾意煮嘢食，喺德國時爸爸開茶餐廳，大個就鍾意煮西餐，自從搬去溫哥華，老公鍾意食中菜，我跟奶奶學拿手潮洲菜，豬手湯、胡椒排骨湯、木耳冬菜湯呢啲。」而唐文龍亦睇得煮得，最拿手小菜係魚香茄子。
袁彩雲相隔近八年沒有出鏡做節目，覺得自己有啲慢，而兩人曾在《妙手仁心II》做情侶，每當節目翻炒都會提起兩人親熱鏡頭，兩人表示希望再合作做情侶，袁彩雲話：「想再拍，唔介意，嗰次好尷尬，人生第一個螢幕初吻獻咗俾佢，當日好怕醜好驚，睇返覺好核突，應該要做多次。依家大家會自然好多，知道投入重要過避忌。」唐文龍則說：「再拍有女人味人生經驗多咗。」
袁彩雲喺加國生活對身形好有要求，盡量keep住體態，曾經流傳泳裝照睇到佢有幾fit，袁彩雲分享做靚媽要訣係開心，出汗係好好嘅扮靚心得，每次流汗後都覺得面色好咗，最重要瞓多啲。老公對佢回流工作意見？袁彩雲話：「佢支持，好彈性，冇嘢做可陪我多啲，我返工佢又可湊女。」今次係誠意，袁彩雲好坦白話：「湊女耐咗，想做其他嘢，離開加拿大兩星期就可以滿足到，再返去見囡囡過聖誕，既開心又有成就感。」仲使唔使追多個b？佢話：「老公話可以唔使再生，我可以專注啲湊女。」
唐文龍都激讚袁彩雲多年來保養得宜期待再合作，佢近日同朋友度緊劇本，製作一個驚粟、恐怖、神怪故事電影，希望半年後可完成，屆時有機會搵袁彩雲做女主角。
更多娛聞，喺晒《娛果》
http://fb.com/appledailyent
 (攝影：林德雄) |  兩人都有烹餁底子，手起刀落斬龍蝦無難度 |  唐文龍都激讚袁彩雲多年來保養得宜 |
 唐文龍指再拍kiss戲嘅話，袁彩雲會更有女人味 |  |  袁彩雲喺加國生活對身形好有要求，盡量keep住體態 |
 |
