跳唱組合As One解體，現年22歲成員陳嘉茵（Kayan）冇放棄演藝夢想，好鍾意跳舞嘅Kayan，今年2月孖BOP成員歐鎮源（Tyrese）情侶檔，為周杰倫歌曲《告白氣球》自編雙人舞拍成短片，喺熱播YouTube，至今累積點擊逾130萬，范振鋒睇中Kayan潛質，簽約後重點力捧，隨後Kayan被安排跳出香港，10月底到台灣參加綜藝節目《希望之星》，前晚已晉身四強。
《希望之星》完騷後，觀眾可透過手機apps參加投票，勝出者有兩萬新台幣獎金（約5,215港元），每場最高分五位繼續留低，下場再加入五位踢館者，本月30日將會係最後一場比賽。Kayan喺第四集以踢館者身份加入，演唱咗羅志祥嘅《精舞門》，該集拎埋最高分數嘅MVP，Kayan至今出賽八次，已經四次取得MVP。
比賽進入尾聲，現時只有淘汰階段，Kayan前晚成功打入四強，佢今日接受《蘋果》電話訪問時話：「好開心，我綵排時緊張到成日唔記得歌詞，滿意今次表現。」Kayan今次揀選咗張靚穎演唱五月天版本嘅《傷心的人別聽慢歌》，佢跳舞時加插咗拉丁舞元素。Kayan有信心打入三強：「仲剩番兩集，希望再接再勵唱到最後。」
Kayan話每次知道有得留底，壓力陪增，佢日前喺觀塘跟排舞師麥秋成練舞，為出戰準備，即場又唱又跳《傷心的人別聽慢歌》，Kayan全程冇索氣，佢接受專訪時話：「香港代表暫時剩番我，每次都超級大壓力，因為每周周五飛台灣準備，周六晚比賽，全民投票即晚有結果，有得留低，周日就要揀歌。返港後，周一練歌，周二排舞，周五再飛返台北。每次都好繃緊，當係最後一次，呢個機會好難得，畀我嘗試到唔同曲風，推自己唔同魅力。」
Kayan揀歌最頭痕，賽制指明要唱國語歌：「因為版權問題，我係唱跳歌手，主要想發揮跳舞，想型啲，我好鍾意張靚穎cover嘅歌，我把聲少少似佢，主要參考佢嘅歌，我再改編，加入自己元素。每次我揀定歌，就諗舞台呈現畀觀眾感受到乜嘢現場氣氛。」Kayan話每次賽前準備都爭分奪秒，佢話：「最缺乏時間，每周五到台灣就即綵排，心理狀態要好ready，我出場前會利用空隙時間調整心情，試過腦海一片空白。我出台前會飲水，閉目養神，畀自己空間靜思，focus狀態。」
Kayan喺台灣彈出，畀受製作單位垂青，已有唱片公司邀合作。有網友指Kayan係「港版蕭亞軒」，Kayan就咁認為：「可能我都鼻高高，輪廓有啲似，我唔抗拒似蕭亞軒，佢係女神，希望好似佢咁成super star。」Kayan當年喺As One中彈唔起，o依家後來居上，佢話：「夢想係要堅持，幾歲都唔會話遲。」
