香港樂壇頒獎禮的戰幔昨日展開，今年由港台搶閘於下午頒部份獎項，容祖兒成為銷量女歌手15年霸，新鮮人夫周柏豪、陳柏宇和林奕匡都抬頭各獲兩獎，在台上多謝老婆放閃；由於頒獎禮分兩日舉行，昨就破格地只頒獎沒表演，掃三獎成大贏家的李克勤抵死說：「今日表演講多謝！」
港台「十大中文金曲」昨搶閘於下午假香港知專設計學院舉行，為慶祝踏入40周年，今年獎項分兩日宣佈，昨率先頒八個獎項（名單見附表），其他大獎留待下月4日假九展頒發。獨領風騷多年的陳奕迅和容祖兒齊缺席頒獎禮，造就後輩有機會上台攞獎，Gin Lee、AGA和JW都處女打入「十優歌手」，樂隊ToNick憑熱爆歌《長相廝守》首奪金曲獎；獲新人金獎的卓顏靈則緊張到手震。
現年50歲的克勤，無論年紀和獲獎數目都是全場之冠，由於昨日只頒獎沒表演，連掃金曲、十優歌手兼五奪銷量男歌手獎的克勤，第三度上台攞獎時抵死說：「今日好得意，今年係金曲40周年，頒獎同唱歌係分開兩日，平時表演唱歌，今日表演講多謝。」完騷後克勤被問到會否覺得分兩日舉行不圓滿？他說：「冇所謂啦，緊張多一次。今日攞十優都有滴汗，因為其他得獎者都好後生。」
新鮮人夫陳柏宇憑《霸氣情歌》獲金曲獎，在台上多謝老婆符曉薇放閃：「好開心，呢首歌代表我同老婆感覺，霸氣有啲自大，我哋愛情冇人取代到。」同樣今年做人夫的林奕匡，憑結婚歌《難得一遇》獲獎，他深情說：「多謝我太太，朋友叫我作首歌畀佢，其實當時太太都有投訴，因為好耐冇畀demo佢聽，但其實係想畀surprise佢，呢首成為我哋結婚時嘅歌。」
去年結婚的柏豪憑《天網》獲獎，他卻沒向老婆致謝。受訪時被問到余文樂和沈嘉偉反面傳聞，柏豪說：「我唔知，都係睇報道。」曾傳柏豪和樂仔反目？他說：「唔係，大家都係朋友，往年有一齊食飯，呢五、六年，沈生有搞飯局拜年，舊年唔喺香港冇出席。」問到做朋友是否少錢銀轇轕較好？他笑說：「多數朋友欠我錢，朋友都係互相尊重，分得好清楚。」
