楊丞琳噚日喺台灣舉行第2場個唱，又係以《年輪說》、《仰望》打頭陣，佢自言前日唱完第1場因為興奮冇瞓得好冧，所以噚晚嗰場比較緊張，男友李榮浩亦低調戴口罩現身支持楊丞琳，噚日出席完上海第十一屆音樂盛典咪咕匯頒獎典禮，即去台灣睇女友嘅演唱會。
第2場搵咗吳宗憲做嘉賓，佢哋相識源於楊丞琳喺13歲嗰陣，參加首個電視比賽節目，當時主持人就係吳宗憲，2002年二人又一齊主持節目《我猜我猜我猜猜猜》。吳宗憲一出場，楊丞琳睇到吳宗憲已經好感動，係咁喊，原本二人合唱《屋頂》，因為楊丞琳一直流緊眼淚，唱唔到，吳宗憲上前立刻擁抱同安慰佢，同楊丞琳講加油，未知係唔係吳宗憲見楊丞琳喊唔停，開始有啲眼濕濕，佢話：「哪有2個人都哭了啦，妳做到了，我第一次在舞台上掉眼淚。」
吳宗憲笑言楊丞琳嘅「青春歲月裡有住著我」，楊丞琳解釋吳宗憲嘅「房租真的有點貴」，自13歲就認識，第一次上節目就係對方做主持，「憲哥看過我最矬的樣子，認識20年了」，吳宗憲表示喺《超級新人王》上，楊丞琳一句話讓吳宗憲哽咽，當時問楊爸爸係做咩行業，楊丞琳就話係演員，但吳宗憲未聽過，楊丞琳直言「我爸爸在我心目中永遠都是巨星」，吳宗憲回想起呢件事就講笑咁話：「我生不出這樣的女兒啊!」
楊丞琳稱吳宗憲係自己喺演藝圈內嘅最大貴人，佢哋仲一齊嗌以前節目嘅開場白「歡迎收看《我猜我猜我猜猜猜》」，而吳宗憲女兒Sandy都有上台，笑說可以同真正嘅偶像楊丞琳企埋一齊好感動，三人更玩selfie，楊丞琳之後送吳宗憲同Sandy搭透明電梯離開，吳宗憲笑言：「楊丞琳妳這電梯應該有到地下18層吧，我剛上來有人在下面唱《新鴛鴦蝴蝶夢》……」無啦啦講起就令人諗起原唱者黃安，讓楊丞琳好尷尬，Sandy即時幫口，隨後二人乖乖咁搭電梯離場。
