公司嘅聖誕氣氛，好靠一年一度嘅聖誕派對大抽奬帶起。站喺員工嘅立場，只希望收份禮物，以安慰自己呢一年來捱更抵夜嘅辛勞。外國打工仔又點呢？據Advertising Specialty Insitute一項調查指，40%受訪公司表示今年會送禮物給員工。禮物啱用，就可成功收買人心；禮物唔啱用，就只係一份無用嘅垃圾。
假如公司準備送聖誕禮物俾各位打工仔，除咗升職加薪，大家最想收到咩？外國有職場專欄講到有關呢一點，不妨參考下。
實用型：送Gift card美國有項消費者調查指，超過60%受訪者表示，曾收過Gift card當係報酬或獎勵，當中91%均稱鍾意收Gift card做禮物。事實上，論實用程度，比起水杯和相架，Gift card係個更好的選擇。事關呢個係最接近折現嘅做法，對方可以想幾時用同買啲乜，都係自己話事，應該無人會討厭呢份「禮物」吧。
窩心型：送時間另一方面，禮物唔係愈大份，就一定愈好。如果份工需要經常捱夜OT，比起物質，員工可能更需要額外嘅有薪假期，「放生」佢哋去做自己想做嘅事，例如陪伴家人，做做運動或SPA。送時間俾員工自製一個美好時光，相信無人會唔鍾意。
文中作者亦提到，在禮物附上小卡片，送上鼓勵或啟發靈感嘅文字，如果加上老細嘅小簽名，窩心程度更能升級。各位打工仔又點睇？順道分享一下大家最想收到嘅心水禮物。
