惠英紅、謝君豪、葉念琛同J.Arie等，今晚現身第二屆澳門國際影展，為佢哋主演嘅《心冤》出席特別首映，《心冤》原本以劇集模式，共有5集，但為咗今次影展特登剪輯成一個90分鐘電影版本。小紅姐同謝君豪話雖然剪成90分鐘，但不影響故事結構，小紅姐仲話：「因為5集每集一個單元，各自有獨立古仔，今次電影版只係剪輯咗其中一個故事出嚟，所以冇影響整套劇集結構。」兩人又話十分好而且故事結構緊密，小紅姐話：「始終Fox係美劇嘅公司，成套拍攝落嚟個感覺都好似拍緊美劇咁。」問到會唔會再有第二季？小紅姐話未傾，如果有都會想拍。
近來仍為電影宣傳嘅小紅姐透露，嚟緊一月就要離開香港拍攝新劇，所以聖誕期間會留喺香港，反而謝君豪出席完今晚活動後，又要趕返橫店繼續拍攝。
另外，有份演出嘅J.Arie表示今次角色對佢係一大突破，佢話：「以前我係做一啲港女嘅角色，今次做一個警察，而且經常要黑口黑面。」佢話最重要嘅就係可以同小紅姐做對手戲：「我同小紅姐都係比較慢熱，入組10日後我哋先開始傾偈，但傾落發現紅姐係好好傾亦都好玩得，係一個好好嘅前輩教咗我好多嘢。」J.Arie又透露劇中都有參與不少動作場面：「不過我通常都係俾人打，因為自己少做運動，所以喺拍攝嘅時候唔小心撞傷條腰。」
 小紅姐透露聖誕期間會留喺香港，一月就要離港拍新劇。 |  小紅姐同謝君豪話《心冤》雖然剪成90分鐘，但不影響故事結構。 |  J.Arie話最重要嘅係可以同小紅姐做對手戲 |
 |
