港人真係慘，唔止要面對土地問題，連睇場騷都隨時一票難求，唔係有「絕望座位表」，就係對戰「排隊黨」，想睇場騷都咁難!
周杰倫《2018地表最強2世界巡迴演唱會》香港站，明年3月22至25號加開四場，今早公開發售。
早上9點前，近百人喺尖沙嘴排隊等買飛，又有「南亞幫」坐陣，排隊頭19個均係南亞裔人士，第20個先係周董香港fans，身穿黑色外套嘅吳小姐及女友人噚日傍晚六點嚟排隊，佢話：「夜晚呢度好凍，其實見前面有19個南亞裔人士，都怕會買唔到飛。」女fans堅持即使買唔到，亦唔會選擇買「黃牛」。
而排21位身穿牛仔褸嘅黃先生，噚晚7點到場排隊，因為未睇過周杰倫演唱會，所以好想用正價去買。
直到今早10點40分，通利職員出嚟，指目前門票所剩無幾，隨後安排啲人照入去，一人限買4張，不過好多人都買唔到，吳小姐同女友人都好失望咁落番嚟，佢嘆氣：「買唔到，好失望!原來得頭3個買到，佢哋(南亞幫)兩個禮拜前已經嚟排隊，聽啲職員講，我唔會買『黃牛』，不過會用其他途徑買門票，我有個朋友同一時間上網買，成功買到兩張。」
黃先生笑言雖然自己買唔到，不過見到好多「排隊黨」都買唔到就覺得好開心。上午11點幾，職員仍未貼出門票售罄嗰張紙，但係相信門票一開賣已被搶購一空。
 (採訪、攝影：黃曉妍) |  「南亞幫」坐陣，排隊頭19個均係南亞裔人士 |  南亞幫喺兩個禮拜前已經嚟排隊 |
 |  近百人喺尖沙嘴排隊等買飛 |  |
