琦琦、陳慧琳(Kelly)、羅蘭等等，今晚喺中環出席手袋品牌舉行的新書分享會，琦琦透露今年聖誕會同囡囡加埋老公任達華去芬蘭過白色聖誕，12月24日生日嘅囡囡，就喺早前慶祝咗。琦琦話：「以前生日會都係由我去搞，今年由囡囡決定地方同主題去慶祝，最後搞咗一個營光生日會，我同老公就坐喺度食下蛋糕同睇小朋友玩。」


至於選擇去芬蘭過聖誕，琦琦話因為囡囡喜歡凍，但那裡目前零下30度，佢都煩惱要着咩衫去。問囡囡有冇要佢送禮物？琦琦笑謂：「冇呀！平時佢150元禮物都話貴，有時間陪佢都係最好嘅禮物！」佢又話老公因為要工作，會先喺芬蘭回港，佢同囡囡留多幾日。


羅蘭同Kelly差唔多時間到場被邀合照，羅蘭姐不停教Kelly擺甫士，Kelly笑住話：「羅蘭姐令人感覺好舒服，希望自己keep住好似佢咁長青，惟一秘訣係要不停做嘢。(無諗退休？)呢個moment幾舒服，照顧到屋企又可以做嘢，但將來唔知，如果小朋友需要我，就放多啲時間，但相信佢哋越來越大，應該唔要媽咪，到時我應該會好sad，咁就多啲出嚟見大家啦！」


問佢點同小朋友保持話題？Kelly笑住話自己會追緊啲，有時會扮知：「佢一講我就話好靚呀好犀利呀咁，但大仔有時都會睇出，話我敷衍佢，咁我就會加多啲形容詞囉！」Kelly表示，聖誕或者會去幾日旅行，因為自己懶，不會去太長，每年最長假期係暑假，通常會去十幾日，但覺得一年去一次就夠，因為真係好攰！




Kelly表示聖誕或者會去幾日旅行羅蘭姐不停教Kelly擺甫士