唔少香港藝人上大陸搵人仔，咁大陸藝人又點算呢？其實佢哋都有好多生財之道，就好似喺股市上搵真銀，仲有唔少明星股神出現o添！
就好似黃曉明同李冰冰，當年佢哋一樣都係大陸華誼兄弟旗下藝人，當中李冰冰喺07年華誼未上市前以18.93萬元(人民幣，下同）入股，上市前擁有36萬股股份。兩年後華誼上市，以發行價每股28.58元嚟講已經勁賺50倍。而喺去年，李冰冰現身上海證券交易所，以股東身分出席文投控股股份有限公司重組更名儀式。資料顯示，李冰冰持有300萬股，開市價43.11元，而當日最高升到43.45元，市值過億元。
至於黃曉明，08年以每股3元購入180萬股華誼股份，喺華誼上市後一年股份解禁可以自行拋股，有指黃曉明全數拋售股份，賺過億人仔。而喺2014年佢同任泉及李冰冰共同出資籌組Star VC風投機構，及後又成立明嘉資本投資公司。
華誼身為大陸最大影視公司當然有唔少動作，就好似喺2013年以2.52億收購著名演員張國立持有浙江常升影視制作有限公司70%嘅股權，而浙江常升成立時註冊資本為1000萬元。
不過如果講到真正嘅股神應該就喺曾經喺電視劇《三國》入面飾演貂蟬嘅陳好，有大陸傳媒指陳好喺06年以每股低於1.4元買入ST黑龍101.09萬股，不過ST黑龍並未企穩，一度跌至0.86元，當時陳好唔單上冇拋售股份，反而仲喺ST黑龍停牌前增持股份，持股高達280.31萬股。直到09年ST黑龍復牌當日市值增加，而陳好一次過股票將持股全數賣出，淨賺2700萬元。
 |  |  |
