大台依家最好睇嘅劇係邊套？
係《壹號皇庭》。
之前《壹號皇庭》成班演員包括林保怡、陳秀雯、陳慧珊、歐陽震華等人Re-U，最難得真係陳秀雯嘅出現，令人懷念。
呢輯相亦令人諗番起，林保怡、陳慧珊今年八月，其實都同《鑑證實錄》一眾演員聚頭，就連「小棠菜」李珊珊都有出嚟。
新相讓大家驚歎時間過得幾快，舊相更令人回味。最近李珊珊執執下屋，發現咗一盒舊相，未到Boxing day就開倉。原來今次開倉，蔡瀾都有份推動0架。今晚，珊珊又喺微博貼咗幾張舊相……係97年嘅《鑑證實錄》等埋位時嘅相。事源當日係珊珊生日，生日都要喺廠開工過，咁一班演員包括大佬源林保怡、大孖蔣克、細孖張松枝、飾演大佬源個細佬曾家喬嘅魯文傑原來一早準備咗個蛋糕俾珊珊，珊珊話當時真係完全唔知有呢個驚喜：「你睇Bowie咁肉緊錫我，就知我真係唔知啦！」
但點解兩張相，即係張松枝同林保怡分別向壽星女獻吻圖，李珊珊要將自己打格呢？仲寫明係「對你們周到體貼」，搞咩呢？珊珊笑言係要向張松枝報仇，因為對方喺早前《鑑證》party上取笑李珊珊「迴光反照」，所以珊珊要報仇，仲細心到早兩日已於微博向張松枝落通牒，事先張揚有驚喜，張松枝回佢：「我只是一個常人，驚喜貴不貴，如平的要一個。」呢張錫錫相唔知平定貴呢？
講開《鑑證》，拍攝期間好笑事成籮，李珊珊回想起，都話「好多喎！大家嗰陣成日整（蠱）嚟整去，但好多都係好無聊，記唔到細節喎！」又爆料話魯文傑亦絕種好男人，珊珊對佢評分極高；又爆林保怡以前成日做司機，義載劇中差館眾手足逐一回家，非常有風度。
另外仲有兩單關於流浮山嘅笑料，珊珊自言「一世都唔會忘記」——都係關於屎。
第一單。拍屍體發現案。同場仲有法醫陳慧珊（Flora）。當時人有三急，於是珊珊就同Flora去附近公廁。一入去，不得了，擺堆擺到滿瀉，壯觀程度就係……「冧」到上頂。珊珊一入去即衝返出嚟嗌唔去，反而係Flora「勉勵」佢：「拍全日0架，拍全日0架，你乖啦！去啦！你忍唔到0架！」
珊珊憶述：「好恐怖！好似一舊軟雪糕咁，冧到上頂，格格都係咁。應該係專登唔沖水，用嚟施肥！」最後同Flora硬著頭皮去。
另一單，又係關於屎。又係流浮山。屍體發現案。案發地點係海邊。等埋位期間，林保怡同李珊珊無聊間，發現岸邊有「一條糞便」。
係「一條糞便」，而且都OK大條。於是珊珊同林保怡兩個無聊人就望住呢條糞便，托頭思考：係人類糞便定狗？咁大條，冇理由係狗狗喎！藏獒都屙唔出咁大條喎！
好衰唔衰當時有位扮交通警嘅臨時演員揸電單車正準備轆過「案發現場」，眼看佢個轆將毫無偏差地轆到呢條糞便再拋物線咁彈向兩位思想家身上，於是林保怡即大嗌：「走呀！」拉住珊珊急逃。
何其悲壯。
 |  呢個表情講屎都幾好笑 |  |
