下年情人節係吳岱融同鍾淑慧結婚22周年紀念，吳岱融為o氹老婆開心，專登唱咗首國語歌《回去愛你十億秒》送畀太太，兩人鮮有以夫妻檔合體，日前喺葵涌拍攝MV，展現唔少親䁥鏡頭，吳岱融同太太深情又攬又錫，好鬼sweet。
吳岱融話首歌內容講男人為事業忙，忽略太太，想鼓勵人珍惜husband and wife，大約都係十億秒。歌詞中都有自己心聲，類似係講男人唔應該要女人流淚咁。鍾淑慧聽到好冧豬，佢話：「第一次版Demo雖然唔係老公唱，但都幾打動女人心，好有吸引力，我都俾啲姊妹聽，大家好有同感，老公平時只會唱人哋啲歌。」o依家有咗兩人主題曲，咁就可以時時都唱。
吳岱融廿幾年前曾經做過一段時間歌星，至近年先再開金口，首歌預計喺下年情人節，即結婚周年紀念日先放上網推出，不過唔使問，楔係已經送咗俾太太先。相隔多年再唱歌，吳岱融話：「我冇壓力，冇諗要得到咩，自己唱開歌，只係冇公開唱。」可以趕及參加頒獎禮做新人？佢話：「完全冇諗呢啲，唔想有呢種壓力，聽歌好得意，人哋鍾意就鍾意，唔使刻意，希望打動到啲情侶。」鍾淑慧話：「有咪bonus囉，開心有得玩。」
兩夫妻自從結婚後冇再合作，笑指喺家中做開男女主角，今次MV專登搵太太做女主角，20歲兒子有參與幕後剪接，吳岱融話：「本來想搵女model，但真實啲啦，網絡咁發達，人人都知我太太係邊個，搵第二個反而冇成意。」雖然此舉令太太開心又感動，但時間緊迫，鍾淑慧嚟唔切收身有壓力，吳岱融即冧老婆話：「想講俾你聽，真係唔使擔心，絕對冇問題，個老公保持得你幾好。」MV中親熱擁抱，鍾淑慧笑說：「冇尷尬喎，我哋屋企成日做嘅，鏡頭前就冇啫，好自然丫，劇情需要。」兩人仲話有啱嘅工作唔抗拒夫妻檔上陣。
 攝影：沈健程 |  下年情人節係吳岱融同鍾淑慧結婚22周年紀念。 |  吳岱融做番老本行唱歌，而鍾淑慧就做MV女主角。 |
 首歌叫人珍惜夫妻關係，鍾淑慧冧晒。 |  |  |
 鍾淑慧嚟唔切收身，吳岱融讚老婆其實keep得幾好。 |  (城周圖片) |  呢次20歲囝囝有參與幕後剪接。(資料圖片) |
