ViuTV主播黃心美喺今年10月嘅冰島之旅，公開有新戀情，事後黃心美話：「公開感情係因為將心比己，拍拖唔想對方收收埋埋，安全感唔只女人需要，男方都要。我哋拍咗好短時間，但過咗三個月試用期，佢係圈外人，好男仔、好孝順，鍾意小動物，亦都對我好好。」(新聞連結：http://bit.ly/2it4ZZy)
有愛情滋潤嘅黃心美，並未因為拍拖而hea住做嘢，佢o依然密密接job，努力搵錢，日前見佢喺中環做完嘢同經理人分道揚鑣後，單拖行去咗上環，不過佢唔係約咗男友拍拖行街街，而係一個人走咗去百貨公司shopping。
最初黃心美漫無目的咁邊行邊send message，之後上咗去睇床上用品，行吓行吓去咗睇床褥，雖然黃心美係宅男女神，不過實質佢嘅性格好豪爽，話晒床褥呢樣嘢一定要瞓過先知啱唔啱，所以佢一啲都冇避忌咁瞓上床慢慢試，嗰個sales亦都好好耐性咁講解。
黃心美試咗兩張床褥，佢對其中一張價值13,000蚊左右嘅床褥好有興趣，試瞓咗兩次，不過最後佢都空手而回，跟住佢又邊行邊撳電話，唔知係同邊個傾偈，連搭自動扶手電梯都冇為意，失平衡咁跌一跌，好彩最後都有驚無險。臨走之前，黃心美走咗去化妝品部睇吓嘢，但係似乎唔係好啱心水，空手離開。
事後問番黃心美係咪諗住同男友同居而去試床，佢話：「我冇諗過同居喎，只係因為我嘅睡眠質素好差，再加上本身張床又瞓咗好多年，所以咪諗住換過張好啲。如果每日瞓到8個鐘，即係話人生有1/3嘅時間喺張床上，大嗱嗱拎5位數字買張床褥，梗係試真啲！」
 攝影：朱志聰 |  話晒黃心美都係公眾人物，但佢無理其他人眼光，照樣瞓上床試吓。 |  好似未係最啱心水嘅一張 |
 又試撳啲床褥 |  店員有上前講解，黃心美都聽得好留心。 |  黃心美邊行邊撳電話，似乎另一方係個「重要人物」，但亦因此失平衡，好彩冇發生意外。 |
 |  行化妝品部都係睇唔啱 |  最後都係空手而回 |
