自1974年起每年12月大家喺電視上都會見到《歡樂滿東華》，今年都唔例外，喺12月2號晚舉行嘅《歡樂滿東華2017》更打破紀錄籌得接近一億二千萬嘅善款，不過當晚嘅演出陣容就大不如前，冇當家小生花旦之餘連歌手都冇乜，據了解就連司儀都差啲唔夠，難怪收視下跌，而東華高層亦已經向大台反映，希望下年會有改善。
《歡樂滿東華》多年嚟都有唔少猛人坐陣，陣容方面亦會由當家一線小生花旦連同歌手演出，不過今年改由一眾港姐好似馮盈盈、麥美恩、張寶兒、張寶欣等負責，全晚節目以唱歌為主，但係就只係得一眾自己友「星夢幫」歌手上台，好似有胡鴻鈞、鄭俊弘等，就連做開主播嘅區永權同埋香港先生翟威廉都要出場唱歌。
而司儀方面一向都係由汪明荃、曾志偉、陳百祥、鄧梓鋒等前輩做主持，不過今年曾志偉因事未能出席，而陳百祥就因為隔日生日，本來已經打算缺席去同一班朋友慶祝，知道唔夠人之後就改為嘉賓主持，喺頭四個環節出場，而阿姐汪明荃咁多年嚟都習慣播完《晚間新聞》就離場，今年為咗顧全大局做到凌晨三點半先走人。
面對今年嘅種種問題，雖然善款不降反升，但係都有唔少不利因素，曾為藝人嘅東華三院第一副主席王賢誌喺接受傳媒訪問時就表示：「今年嘅陣容我都覺得唔及我以前做藝人參加時咁強勁，聽聞因為小生花旦及歌手都好難拎到檔期出嚟，可能因為大陸市場大預算又大啦，都無可厚非，其實創意都好重要，唔一定要卡士強勁先吸引到觀眾，或者近年少咗人睇電視都會影響收視。」下年王賢誌就會出任主席一職，佢話：「我現時著眼喺明年《東華》，我係藝員出身，我想做一個大家一定會睇嘅《歡樂滿東華》，令觀眾重拾昔日嘅感覺，暫定明年12月8號舉行，希望離台慶遠少少，大家易啲夾檔期，我都打緊『人情牌』開始搵人幫手。」
